Бутун дунёга машҳур Flappy Bird ўйинининг ўзбекча талқини сифатида эътироф этиш мумкин бўлган «Учар кетмон» дастури Android смартфон ва планшет эгалари учун ҳам чиқди. Бу ҳақда «Учар кетмон»нинг Facebook’даги саҳифасида маълумот берилган.
«Кун»нинг ёзишича, «Учар кетмон» ўйини Google Play онлайн-дўконига 3 июль куни жойлаштирилган. Ҳозиргача уни 500—1000 марта кўчиришган. Тез орада ўйин ичида тўпланган натижани Facebook орқали намойиш этиш имконини берувчи тугма қўшилиши режалаштирилмоқда.
Эслатиб ўтамиз, Flappy Bird’дан илҳом олиб ишлаб чиқилган, бироқ «Flappy Bird’га дам берувчи» «Учар кетмон» ўйини аввалроқ iOS операцион тизимида ишловчи смартфон ва планшетлар – iPhone ва iPad учун чиқарилган эди. Дастур бир ҳафтадан бери App Store’нинг Ўзбекистон сегментида кўчириб олишлари сони бўйича пешқадамликни ҳеч кимга бермай келмоқда.
Ўйин машҳур Flappy Bird ўйини ҳамда ўзбек киноси хазинасига айланган комедия фильмлар (жумладан, «Абдуллажон»)га асосланган бўлиб, учар кетмон минган киши тўсиқлар орасига йиғилган сўмларни (5 минг сўмликлар) йиғиб чиқиши керак.
Фойдаланувчи сўмларни йиғиш вақтида тўсиққа урилиб ютқазса, «Абдуллажон» фильмидаги Бозорвой ва бошқа образлардан «Сигир десам, мол экансан-ку!», «Ҳа, Ойтовоғ-а!» ва бошқа шу каби овозлар, агар кўп пул йиғса, «Миллионер бўпкетдим-а!» каби овози эшитилади. Ўйин давомида фильмлардан олинган бошқа иқтибосларни ҳам эшитиш мумкин.
Изоҳ (0)