News of the World нашри собиқ муҳаррири ва Буюк Британия бош вазири ёрдамчиси Энди Коулсон 18 ойлик қамоқ жазосига маҳкум этилди. Бу ҳақда Agence France-Presse хабар берди.

У газетада ишлаётган вақтида сиёсатчилар овозли почталарини тинглаш мақсадида жинояткорона тил бириктирганликда айбланди. У билан бирга газетанинг бошқа собиқ ходимлари ҳам турли муддатга озодликдан маҳрум қилинди.

News of the World газетаси Бирлашган Қиролликдаги таниқли сиёсатчилар, қироллик оиласи аъзолари, бизнесменлар, мусиқачилар ва бошқаларнинг овозли почталарини ноқонуний равишда тинглаб келгани 2011 йилда ошкор бўлган эди. Махфий маълумотларни қўлга киритиш учун муҳаррирлар полиция ходимларига пора берган, хусусий детективлар ёллаган.