АҚШ элчиси Жорж Крол: «Ўзбекистон юрагимда мангу яшайди»
3 июль куни Ўзбекистондаги АҚШ элчихонасида Америка мустақиллик кунига бағишланган тадбир бўлиб ўтди. Бу ҳақда элчихонанинг ижтимоий тармоқлардаги саҳифаларига таяниб «Анҳор» нашри хабар берди.
Тадбирда мингга яқин одам, шу жумладан, бош вазир биринчи ўринбосари Рустам Азимов, ташқи иқтисодий алоқалар, инвестициялар ва савдо вазири Элёр Ғаниев, Олий мажлис Қонунчилик палатаси спикери Дилором Тошмуҳаммедова, парламент аъзолари, ўзбек эстрадаси юлдузлари ҳамда ОАВ вакиллари қатнашди.
АҚШ элчиси Жорж Крол нутқ сўзлаб, шароитга кўра, иш сафарининг ниҳояси сабабли бу нутқи диёримиздаги охиргиси эканлигини таъкидлаб ўтди. Нутқида юртимиз ҳақида жуда илиқ гаплар айтди.
«Бу диёрда 4 йилдан буёнман. Аввалига юрт соғинчи қалбимни ўртарди. Бироқ бу ернинг одамлари шу даражада меҳмондўст, кўнгли тоза ва меҳрли эканларки, у туйғу мени бирпастдан тарк этди. Мен бу элнинг деярли ҳамма жойларида бўлдим. Сизлар менга ўз тилингизни, урф-одатларингизни, ўрнак бўладиган ота-она ҳамда фарзанд ўртасидаги муносабатларни ўргатдингиз», — деди у.
Элчининг айтишича, «у бу заминга эмас, бу замин унга кўпроқ нарса берди». «Бу ердан кетар эканман,ўзим билан ажойиб таассуротлар олиб кетаяпман. Мен шуни баралла айтишим мумкинки, Ўзбекистон менинг бир бўлагим бўлиб қолди», — деди Кролл.
Эслатиб ўтамиз, АҚШ президенти Барак Обама Жорж Кролни АҚШ сенатига Қозоғистон элчиси лавозимига тавсия этган. АҚШнинг Ўзбекистондаги элчиси ким бўлиши эса ҳали аниқ эмас.
