2014 йилнинг ўтган беш ойида Ўзбекистонга давлат тилида маркировка қилиниши шарт бўлган қиймати 812 миллион АҚШ долларидан зиёд истеъмол товарлари келтирилди, деб хабар бермоқда ЎзА.
Ўзбекистон Республикаси Давлат божхона қўмитаси вакиллари импорт товарларни маркировка қилиш тартиб-таомилларини такомиллаштириш масалаларига бағишланган матбуот анжуманида журналистларга шу ҳақда маълум қилди.
2002 йилда бошланган мамлакатга олиб кириладиган истеъмол маҳсулотларини давлат тилида маркировка қилиш дастлаб 11 турдаги товар — озиқ-овқат маҳсулотлари, дори воситалари, ўғит, бўёқ моддалар, гигиена ва косметика воситалари, маиший электр анжомлари, ўйинчоқ ва бошқа товарларни ўз ичига олган эди. Божхона ходимларининг таъкидлашича, маҳсулотлар мамлакат ҳудудига ишлаб чиқарувчилар ёки етказиб берувчилар томонидан киритилгунга қадар ёхуд ундан кейин давлат тилидаги маркировка (аксарият ҳолларда наклейкалар шаклида) қадоқланган буюм (тара) нинг исталган жойига ёпиштирилиши мумкин эди.
2013 йил 1 июлдан мамлакатга олиб кириладиган товарларни давлат тилида мажбурий маркировка қилишнинг янги тартиби жорий этилди. Бундай маҳсулотлар рўйхати 44 турга кўпайтирилиб, истеъмолчиларга тақдим этиладиган маълумотлар ишончли, тўлиқ ва очиқ бўлишига нисбатан талаблар кучайтирилди, маркировка ишлаб чиқарувчи корхона томонидан қўйилиши белгиланди. Ушбу талабларга риоя этмаслик савдо қоидаларини бузиш сифатида баҳоланади ва жавобгарликка тортилади.
2013 йил 1 июлгача олиб келинган ва вақтинча омборларда сақланган, кейин эркин муомалага чиқарилган истеъмол товарларини давлат тилидаги маркировкасиз 2014 йилнинг 1 январигача сотишга рухсат берилган эди. Бу 2013 йил 1 июлга қадар Ўзбекистон Республикаси ҳудудида аввалги қоидаларга биноан маркировка қилинган товарларга ҳам тааллуқлидир.
Тадбирда Ўзбекистон Республикаси Вазирлар Маҳкамасининг шу йил 5 февралда қабул қилинган «Импорт қилинадиган истеъмол товарларининг айрим турларини маркировка қилиш ва божхонада расмийлаштириш тартибини такомиллаштириш тўғрисида»ги қарори хусусида ҳам атрофлича маълумот берилди. Қарорга мувофиқ, ишлаб чиқарувчи корхоналар томонидан давлат тилида маркировка қилиниши шарт бўлган импорт қилинадиган истеъмол товарларининг айрим турларини маркировка қилиш ва божхонада расмийлаштириш қоидалари тасдиқланди.
Янги киритилган ушбу тартиб-қоидалар импорт қилинадиган товарларнинг мамлакатимизга ноқонуний олиб кирилишига қарши курашни кучайтириш, импорт ҳажмини назорат қилиш, қалбакилаштирилган, келиб чиқиши ва олиб кирилиши қонунийлигига шубҳа туғдирадиган маҳсулот ва товарлар сотилишининг олдини олишга ёрдам бермоқда.
Изоҳ (0)