2014-yilning o‘tgan besh oyida O‘zbekistonga davlat tilida markirovka qilinishi shart bo‘lgan qiymati 812 million AQSh dollaridan ziyod iste’mol tovarlari keltirildi, deb xabar bermoqda O‘zA.
O‘zbekiston Respublikasi Davlat bojxona qo‘mitasi vakillari import tovarlarni markirovka qilish tartib-taomillarini takomillashtirish masalalariga bag‘ishlangan matbuot anjumanida jurnalistlarga shu haqda ma’lum qildi.
2002-yilda boshlangan mamlakatga olib kiriladigan iste’mol mahsulotlarini davlat tilida markirovka qilish dastlab 11 turdagi tovar — oziq-ovqat mahsulotlari, dori vositalari, o‘g‘it, bo‘yoq moddalar, gigiyena va kosmetika vositalari, maishiy elektr anjomlari, o‘yinchoq va boshqa tovarlarni o‘z ichiga olgan edi. Bojxona xodimlarining ta’kidlashicha, mahsulotlar mamlakat hududiga ishlab chiqaruvchilar yoki yetkazib beruvchilar tomonidan kiritilgunga qadar yoxud undan keyin davlat tilidagi markirovka (aksariyat hollarda nakleykalar shaklida) qadoqlangan buyum (tara) ning istalgan joyiga yopishtirilishi mumkin edi.
2013-yil 1-iyuldan mamlakatga olib kiriladigan tovarlarni davlat tilida majburiy markirovka qilishning yangi tartibi joriy etildi. Bunday mahsulotlar ro‘yxati 44 turga ko‘paytirilib, iste’molchilarga taqdim etiladigan ma’lumotlar ishonchli, to‘liq va ochiq bo‘lishiga nisbatan talablar kuchaytirildi, markirovka ishlab chiqaruvchi korxona tomonidan qo‘yilishi belgilandi. Ushbu talablarga rioya etmaslik savdo qoidalarini buzish sifatida baholanadi va javobgarlikka tortiladi.
2013-yil 1-iyulgacha olib kelingan va vaqtincha omborlarda saqlangan, keyin erkin muomalaga chiqarilgan iste’mol tovarlarini davlat tilidagi markirovkasiz 2014-yilning 1-yanvarigacha sotishga ruxsat berilgan edi. Bu 2013-yil 1-iyulga qadar O‘zbekiston Respublikasi hududida avvalgi qoidalarga binoan markirovka qilingan tovarlarga ham taalluqlidir.
Tadbirda O‘zbekiston Respublikasi Vazirlar Mahkamasining shu yil 5-fevralda qabul qilingan “Import qilinadigan iste’mol tovarlarining ayrim turlarini markirovka qilish va bojxonada rasmiylashtirish tartibini takomillashtirish to‘g‘risida”gi qarori xususida ham atroflicha ma’lumot berildi. Qarorga muvofiq, ishlab chiqaruvchi korxonalar tomonidan davlat tilida markirovka qilinishi shart bo‘lgan import qilinadigan iste’mol tovarlarining ayrim turlarini markirovka qilish va bojxonada rasmiylashtirish qoidalari tasdiqlandi.
Yangi kiritilgan ushbu tartib-qoidalar import qilinadigan tovarlarning mamlakatimizga noqonuniy olib kirilishiga qarshi kurashni kuchaytirish, import hajmini nazorat qilish, qalbakilashtirilgan, kelib chiqishi va olib kirilishi qonuniyligiga shubha tug‘diradigan mahsulot va tovarlar sotilishining oldini olishga yordam bermoqda.
Izoh (0)