Ўзбекистон Ички ишлар вазирлиги Йўл ҳаракати хавфсизлиги давлат хизмати автомобиль салонига фақат мониторсиз видеорегистратор ўрнатиш мумкинлиги, монитор бўлган тақдирда, у салоннинг олд қисмида бўлмаслиги лозимлиги ҳақида ўз тавсияларини эълон қилди.
«Ўзбекистон Вазирлар Маҳкамаси қарори билан тасдиқланган Йўл ҳаракати қоидаларига кўра, ҳайдовчига транспорт воситаси салонининг олд қисмига, жумладан, асбоб-ускуналар панели, қуёшдан ҳимоя соябони ва орқани кўриш ойнасига теле-, видеомониторлар ўрнатиш тақиқланади», — дея ушбу масала бўйича қонуний талаблар келтирилди.
Ушбу қоидага риоя қилинмаган тақдирда энг кам ойлик иш ҳақининг икки баробарида жарима солинади. Ушбу қонунбузарлик йил давомида қайта содир этилса, энг кам ойлик иш ҳақининг уч баробаридан олти баробаригача жаримага тортилади ёки транспорт воситасини бошқариш ҳуқуқидан олти ойдан бир йилгача маҳрум қилинади.
27 май куни Ички ишлар вазирлиги Йўл ҳаракати хавфсизлиги бош бошқармаси вакиллари тўғридан-тўғри мулоқот чоғида фуқароларнинг тегишли саволларига жавобан Ўзбекистонда автомобилларга видеорегистратор ўрнатишга рухсат берилмаслигини маълум қилган еди.
Gazeta.uz томонидан келтирилган ЙҲХББ вакилларининг бундай баёнотлари фуқароларда кўплаб саволларни келтириб чиқарди, интернетда қизғин баҳсларга сабаб бўлди.
Гап шундаки, видеорегистраторлардан фойдаланиш мумкин эмаслигига аниқ сабаблар келтирилмаган, мавжуд қонунлар билан ҳам асосланмаган.
Изоҳ (0)