Интернетнинг ўзбек тилида мулоқот қилувчи сегментига йўналтирилган лойиҳаларга бағишланган «Узнет уммони» конференциясининг биринчи сони 31 май, шанба куни Тошкент ахборот технологиялари университети кичик мажлислар залида бўлиб ўтди. Анжуман «Мулоқот» сайтлар тармоғи ва ТАТУ томонидан Newmax компанияси, Technecy компанияси ҳамда «Кун» нашри билан ҳамкорликда ташкил этилди.
«Кун»нинг хабар беришича, анжуманда ўзбек тилида сайт, интернет-лойиҳа, мобил дастур ишлаб чиқаётган мутахассилар дуч келаётган муаммолар муҳокама қилинди ва уларнинг ечимлари бўйича таклифлар берилди. Хусусан, унда бугунги ўзбек онлайн-журналистикаси аҳволи, IT-технологияларни ўзбекчалаштириш жараёнлари, ўзбек тилида ёзадиган блоггерлар фаолияти, ўзбекча контент яратиш муаммолари, ўзбекча SMM’нинг истиқболи ва Ўзбекистондаги IT-компаниялар тажрибаси ҳақида сўз борди.
Қизғин муҳокама қилинган мавзулардан бири – ўзбек ёзувининг икки алифбо – кирилл ва лотинда олиб борилаётгани, бу сайт эгалари ва интернет-ресурслар учун маълум маънода қўшимча харажатларга сабаб бўлаётгани, шу билан бирга, янги сайт ташкил қилувчилар олдида сайтни қайси ёзувда олиб бориш борасида осон бўлмаган танлов юзага келаётгани қайд этилди.
«Мен янги сайт ташкил қилаётганларни имкон қадар лотин алифбосига асосланган ёзувдан фойдаланишга чақирган бўлар эдим. Чунки бугунги кунга келиб деярли барча операцион тизимлар лотин алифбосига асосланган ўзбек ёзуви бўйича ўзбекчага таржима қилинмоқда», — деди IT-дастурлар ва қурилмаларни ўзбекчалаштириш бўйича мутахассис Ҳамза Фозилжонов.
Шунингдек, Newmax компанияси ва CityTaxi такси-компанияси раҳбарларидан бири ҳисобланган Акмал Пайзиев ёш интернет-ишбилармонларни ўзларидаги қўрқувларни енгишга ва айнан ўзлари хоҳлаётган ишни қилишга чақирди. «Ғояларингизни ўз ичингизда муҳокама қилиб, ўлдириб юборманг. Уларни бошқалар билан муҳокама қилинг ва ҳаётга татбиқ этинг», — дея маслаҳат берди Пайзиев.
2014 йилнинг январь—март ойларида бўлиб ўтган Ўзблоггерлар чемпионати ташкилотчиси, ҳуқуқшунос ва блоггер Хушнудбек Худайбердиевнинг таъкидлашича, чемпионатнинг иккинчи фасли учун, блоггерларни ҳакамлар ва ўқувчилар томонидан баҳолаб бориш имконини берадиган портал ишлаб чиқилади ва унинг мукофот жамғармаси 13—16 миллион сўмни ташкил этади ҳамда бош ғолибга, ҳомийлар ёрдамида 10 миллион сўм миқдорида мукофот пули берилиши режалаштирилмоқда.
«Узнет уммони» конференцияси ташкилотчиси Фарҳод Файзуллаевнинг маълум қилишича, конференциянинг кейинги сони футбол бўйича 2014 йилги жаҳон чемпионатидан сўнг ўтказилиши кутилмоқда. Унда меҳмон сифатида ушбу мусобақани бевосита ёритишда қатнашадиган Uff.uz жамоаси ҳам иштирок этиши кутилмоқда.
Изоҳ (0)