2014 йил 19 май куни Германия Федератив Республикасининг Ўзбекистондаги элчихонасида бутун Ўзбекистон бўйича немис тилини ўрганадиган талабалар орасида еттинчи маротаба «Нотиқлик санъати» шиори остида танлов ўтказилди. Бу ҳақда Германиянинг Тошкентдаги элчихонаси матбуот хизмати хабар берди.
Танловда иштирок этган жами 16 та олий ўқув юрти ўз талабалари ўртасида немис тили бўйича ички танлов ўтказиб, Германия элчихонасида бўлиб ўтадиган якуний босқич учун биттадан вакилни аниқлаб берди.
Танловда ёш нотиқлар олдиндан танлаб олинган маълум бир мавзу бўйича ўз нуқтаи назарини тингловчилар қаршисида немис тилида ифодалаб бериши зарур.
Мусобақа доирасида якуний босқичга чиққан жами 16 нафар талаба танланган мавзу бўйича беш дақиқа давомида нутқ сўзлаши ва ҳайъат аъзоларининг мавзу бўйича саволларига жавоб бериши лозим эди.
Танловда иштирокчиларнинг тилни билиш даражаси, реторик иқтидори, нутқнинг сифати ва ўзига хослиги ҳамда мавзунинг мазмунан очиб берилишига баҳо берилди.
Ғолибликни Жаҳон иқтисодиёти ва дипломатия университети 2-босқич талабаси Бобомурод Муҳиддинов қўлга киритди. Иккинчи ўринни ўз нутқи билан Ўзбекистон давлат жаҳон тиллари университети 3-босқич талабаси Анастасия Корсакова эгаллади. Учинчи ўринни эса Фарғона давлат университети 4-босқич талабаси Шоирахон Хожихонова ва Бухоро давлат университети 3-босқич талабаси Азиза Ҳотамова эгаллади. Танлов ғолиблари ва иштирокчилар шу куни кечки пайт элчихонанинг маданият ва матбуот бўлими раҳбари Мелани Молтманн хонимнинг резиденсиясида бўлиб ўтган тантанали зиёфат доирасида немис тилидаги китоблар ва аудио-дисклардан иборат совғалар билан тақдирланди.
Изоҳ (0)