Россия ташқи ишлар вазирлиги Ғарбий Урал машинасозлик концерни президенти Александр Поздеевга нисбатан Ўзбекистонда қўзғатилган жиноий иш юзасидан изоҳ билдирди. Бу ҳақда Россия Федерациясининг Тошкентдаги элчихонаси тарқатган маълумотга таяниб, Gazeta.uz хабар берди.
«Россия ТИВ Александр Поздеев Тошкентда ҳибсга олинганидан буён ушбу ҳодиса билан боғлиқ вазиятни диққат билан кузатмоқда, – дейилади вазирлик баёнотида. – Ҳодиса Россия бизнес жамоатчилиги эътиборидан четда қолмади. Улар бундай воқеалар Россия-Ўзбекистон савдо-иқтисодий ҳамкорлигига жиддий зарар етказади, деб ҳисоблайди».
Россия элчихонаси Александр Поздеевни консуллик ташрифи билан зиёрат қилиш ҳақида ўзбек томонига мурожаат қилди, бироқ уларнинг сўрови ҳозирча қондирилгани йўқ.
«Келиб тушаётган маълумотларга кўра, Тошкент шаҳар судининг 19 майдаги мажлисида қамоқда сақлаш чорасини ҳеч қаёққа чиқиб кетмаслик тўғрисидаги тилхат билан алмаштириш ҳақида Поздеевнинг адвокатлари томонидан берилган апелляция шикояти кўриб чиқилмаган. Ушбу шикоятга Россия элчихонасининг Ўзбекистон Республикаси ТИВга тегишли мурожаати ҳам илова қилинган эди», – дея таъкидланади хабарда.
РФ ташқи ишлар вазирлиги ўз баёнотини Поздеев иши атрофида шаклланган вазият юзасидан хавотир билдириб: «Адлия органлари конструктив ҳамкорликка тайёр бўлмагани сабабли турли гап-сўзлар пайдо бўлмоқда, улар Россия Федерацияси ва Ўзбекистон Республикаси ўртасидаги юқори даражадаги стратегик шерикликка соя солади», – дея якунлади.
Изоҳ (0)