20 май куни соат тахминан 22:00 да Тошкентнинг баъзи қисмларида аҳоли қоронғи осмонда нурга ўхшаш ёруғликни кузатган. Facebook фойдаланувчилари «Водители Ташкента» гуруҳига ушбу ҳодиса ҳақида гувоҳлик берувчи суратларни жойлаган.
«Қизиқ, бу нима экан?» деган саволга баъзи фойдаланувчилар унинг метеорит ёки комета бўлиши мумкинлиги ҳақида тахмин билдирган бўлса, баъзилар унинг учар ликопча эканини ҳазилона қайд этган.
Сал кейинроқ асл воқеадан хабардорлар вазиятга ойдинлик киритиб, унинг Россиядан учирилган «Тополь» ракетаси экани ҳақида ёзишган.
20 май куни Россиянинг Астрахань вилоятидаги «Капустин Яр» полигонидан РС-12М «Тополь» қитъалараро баллистик ракета (ҚБР) синов тариқасида учирилди.
Ракета Москва вақти билан 21:08 (Тошкент вақти билан 22:08)да учирилди. У берилган аниқликда Қозоғистон Республикасининг «Сари-Шаган» полигонидаги нишонни урди.
Изоҳ (0)