2014 йилнинг 24—25 апрель кунлари Ўзбекистон Республикаси делегацияси Бангладеш пойтахти Даккага ташриф буюрди. Бундан мақсад икки давлат ўртасида ўзаро манфаатли савдо-иқтисодий ҳамкорликни кенгайтириш истиқболлари масалаларига бағишланган икки томонлама музокара ўтказиш бўлди. Бу ҳақда Ташқи иқтисодий алоқалар, инвестициялар ва савдо вазирлиги матбуот хизмати хабар берди.
Ташриф чоғида Бангладеш бош вазири Шайх Ҳасина, тижорат вазири Тофаил Аҳмад, ташқи ишлар вазири Шаҳриёр Алам, тўқимачилик маҳсулотлари ишлаб чиқарувчилар ва экспорт қилувчилар уюшмалари ва Бангладешнинг етакчи компаниялари раҳбарлари билан учрашувлар ўтказилди.
Бангладеш тўқимачилик саноатига пахта толаси етказиб бериш, енгил автомобиллар, қишлоқ хўжалиги техникаси, минерал ўғитлар, кимёвий маҳсулотлар ва бошқаларни Бангладеш бозорига экспорт қилиш масалалари муҳокама этилди.
Бангладеш томони Ўзбекистон ҳудудида тўқимачилик маҳсулотлари ва фармацевтика препаратлари ишлаб чиқариш соҳасида ҳам ҳамкорликни ривожлантиришга қизиқиш билдирди.
Ташриф якунида ташқи савдо компаниялари билан 200 миллион доллардан ортиқ суммага Бангладешга маҳсулот етказиб бериш бўйича шартнома ва келишувлар имзоланди.
Изоҳ (0)