2014-yilning 24—25-aprel kunlari O‘zbekiston Respublikasi delegatsiyasi Bangladesh poytaxti Dakkaga tashrif buyurdi. Bundan maqsad ikki davlat o‘rtasida o‘zaro manfaatli savdo-iqtisodiy hamkorlikni kengaytirish istiqbollari masalalariga bag‘ishlangan ikki tomonlama muzokara o‘tkazish bo‘ldi. Bu haqda Tashqi iqtisodiy aloqalar, investitsiyalar va savdo vazirligi matbuot xizmati xabar berdi.
Tashrif chog‘ida Bangladesh bosh vaziri Shayx Hasina, tijorat vaziri Tofail Ahmad, tashqi ishlar vaziri Shahriyor Alam, to‘qimachilik mahsulotlari ishlab chiqaruvchilar va eksport qiluvchilar uyushmalari va Bangladeshning yetakchi kompaniyalari rahbarlari bilan uchrashuvlar o‘tkazildi.
Bangladesh to‘qimachilik sanoatiga paxta tolasi yetkazib berish, yengil avtomobillar, qishloq xo‘jaligi texnikasi, mineral o‘g‘itlar, kimyoviy mahsulotlar va boshqalarni Bangladesh bozoriga eksport qilish masalalari muhokama etildi.
Bangladesh tomoni O‘zbekiston hududida to‘qimachilik mahsulotlari va farmatsevtika preparatlari ishlab chiqarish sohasida ham hamkorlikni rivojlantirishga qiziqish bildirdi.
Tashrif yakunida tashqi savdo kompaniyalari bilan 200 million dollardan ortiq summaga Bangladeshga mahsulot yetkazib berish bo‘yicha shartnoma va kelishuvlar imzolandi.
Izoh (0)