Қозоғистон Президенти Нурсултон Назарбоев 12 апрель куни «2011 йил 18-октябрдаги Эркин савдо ҳудуди тўғрисидаги Шартномани унинг Томонлари ва Ўзбекистон Республикаси ўртасида қўллаш ҳақидаги Баённомани ратификация қилиш тўғрисида»ги Қонунни имзолади. Бу ҳақда Қозоғистон раҳбари расмий сайти берган маълумотга таяниб Gazeta.uz хабар берди.
МДҲ Эркин савдо ҳудуди ҳақидаги шартнома эркин савдо ҳудудининг самарали ишлаши, жаҳон иқтисодиёти ва халқаро савдо тизимида товарлар ҳамда интеграциялар эркин ҳаракати учун шарт-шароитлар шакллантириш каби мақсадларни ўз ичига олган.
Ушбу Баённома 2013 йил 31 май куни Минск шаҳрида бўлиб ўтган МДҲ давлатлари ҳукумат раҳбарлари иштирокидаги йиғилишда имзоланган эди.
2020 йил 31 декабрга қадар ёки Ўзбекистон Бутунжаҳон савдо ташкилотига қўшилгунича Ўзбекистон ва шартнома томонлари Тарифлар ва савдо бўйича бош келишувнинг III моддасига биноан ўзаро савдода миллий режимни тақдим этиш мажбуриятларидан озод этилади.
Эслатиб ўтамиз, Ўзбекистон Республикаси Президенти Ислом Каримов 2013 йил 27 декабрь куни «2011 йил 18-октябрдаги Эркин савдо ҳудуди тўғрисидаги Шартномани унинг Томонлари ва Ўзбекистон Республикаси ўртасида қўллаш ҳақидаги Баённомани ратификация қилиш тўғрисида»ги Қонунга имзо чекди.
2 апрель куни эса Россия президенти Владимир Путин «2011 йил 18-октябрдаги эркин савдо тўғрисидаги шартномани унинг томонлари ва Ўзбекистон Республикаси ўртасида қўллаш ҳақидаги баённомани ратификация қилиш тўғрисида»ги Федерал қонунни имзолади.
Изоҳ (0)