“Mening yurtim” (MY5) telekanali muxbiri Ruxsora G‘afurova o‘zgalar nomiga isteʼmol krediti olib, uni o‘zlashtirganlikda gumon qilinayotgan sobiq bank xodimi haqida tayyorlagan materiali ortidan ochilgan maʼmuriy ish tugatildi. Bu haqda Ruxsora G‘afurova “Daryo”ga maʼlum qildi.
-RAMdTQZF-qLPlcTzk.avif)
Nima bo‘lgan edi?
Jurnalist o‘zgalar nomiga isteʼmol krediti olib, uni o‘zlashtirganlikda gumon qilinayotgan sobiq bank xodimi haqida material tayyorlagan va uni efirga uzatgan. Surishtiruv keng muhokamalarga sabab bo‘lgan va holat yuzasidan jinoyat ishi qo‘zg‘atilgan.
O‘zgalar nomiga kredit olganlikda gumon qilinayotgan bank xodimi haqidagi surishtiruvi ortidan jurnalist Ruxsora G‘ofurovaga nisbatan maʼmuriy ish qo‘zg‘atilgan. Jurnalistga Maʼmuriy javobgarlik to‘g‘risidagi kodeksning 46−2-moddasi (shaxsga doir maʼlumotlar to‘g‘risidagi qonunchilikni buzish) bilan maʼmuriy huquqbuzarlik to‘g‘risidagi ish qo‘zg‘atilgan va to‘plangan hujjatlar jinoyat ishlari bo‘yicha Mirzo Ulug‘bek tumani sudiga oshirilgan edi.
Oliy sud jamoatchilik bilan aloqalar markazi rahbari Aziz Obidovning maʼlum qilishicha, ishni ko‘rib chiqishga tayyorlash vaqtida ish hujjatlari Maʼmuriy javobgarlik to‘g‘risidagi kodeksning 303-303-1-moddalari talablari buzilgan holda sudga yuborilgani aniqlangan. Shu sababli ushbu ish materiali qayta rasmiylashtirish uchun Mirzo Ulug‘bek tumani IIO FMBga qaytarilgan.
Tuman ichki ishlar bo‘limi hujjatlari sudga qayta yuborilgan va ish 2-aprel kuni jinoyat ishlari bo‘yicha Mirzo Ulug‘bek tuman sudi binosida ko‘rib chiqilgan.
“Ruxsora G‘ofurova bilan bog‘liq holat yuzasidan Mirzo Ulug‘bek tumani IIO FMB 3-IIB XPB profilaktika inspektori tomonidan 2025-yil 17-fevral kuni jinoyat ishini rad etish hamda maʼmuriy ish qo‘zg‘atish haqida qaror qabul qilingan va ish hujjatlari sudning ish yurituviga kelib tushgan. Tuman sudi tomonidan 2025-yil 26-fevral kuni ushbu ish Maʼmuriy javobgarlik to‘g‘risidagi kodeksning 303-moddasi (maʼmuriy huquqbuzarlik to‘g‘risidagi ishni ko‘rib chiqishga tayyorlanish) hamda 303−1-moddasiga (maʼmuriy huquqbuzarlik to‘g‘risidagi ish materiallarini qaytarish) asosan, kamchiliklarni bartaraf etish uchun qayta rasmiylashtirishga qaytarilgan. Ammo profilaktika inspektori tomonidan zarur protsessual harakatlar amalga oshirilmasdan ish 2025-yil 2-aprel kuni sudga qayta yuborilgan”, deyiladi sud qarorida.
Sud yuqoridagilardan kelib chiqqan holda, Ruxsora G‘afurovaga oid maʼmuriy huquqbuzarlik to‘g‘risidagi ishni Maʼmuriy javobgarlik to‘g‘risidagi kodeksning 36-moddasi (maʼmuriy jazo qo‘llanish muddatlari)da nazarda tutilgan maʼmuriy jazo qo‘llash muddatlari o‘tib ketgani sababli kodeksning 271-moddasi 7-bandiga asosan, tugatishni lozim, deb topgan.
Eslatib o‘tamiz, arizachi taraf (sobiq bank xodimi) sudga Ruxsora G‘afurovaga nisbatan daʼvosi yo‘qligi haqida xat bergan edi.
Izoh (0)