Fransiya poytaxti Parij shahrida “Zamonlar osha nigoh: Xudoybergan Devonov merosi” ko‘rgazmasi o‘tkazilmoqda.
O‘zbekiston prezidenti yordamchisi Saida Mirziyoyeva hamisha jahon hamjamiyatiga O‘zbekistonni o‘ziga xos rakurslarda ko‘rsatishga, mamlakatning kutilmagan qirralarini namoyish etishga harakat qilinishini maʼlum qildi.
“Har bir tadbir odamlarda chinakam qiziqish uyg‘otadi — ular O‘zbekistonni o‘zlari uchun yangitdan kashf etishadi. Mana bugun Parijni “Zamonlar osha nigoh: Xudoybergan Devonov merosi” ko‘rgazmasiga taklif qilmoqdamiz”, deb yozadi prezident yordamchisi.
Taʼkidlanishicha, ko‘rgazma Markaziy Osiyodagi birinchi professional fotograf va kinotasvirchi, O‘zbekistondagi ilk foto va video laboratoriya asoschisi tomonidan olingan 34 ta noyob kadrdan iborat.
“Bu madaniy o‘zligimizni ifoda etuvchi tashabbuslardan biri, qadriyatlarimiz va anʼanalarimizni anglash uchun bebaho tarixiy manba.
Parijliklar ulkan arxivning bir qismi bo‘lgan ushbu fotokolleksiyadagi ko‘plab suratlarning ilk tomoshabiniga aylanishadi. Mazkur noyob suratlar ilgari na mamlakatimizda, na xorijda namoyish etilgan. Ularda o‘tmishning betakror lahzalari — Xorazmning kundalik hayoti, urf-odatlari, meʼmorchiligi va odamlar turmushi aks etgan.
Ekspozitsiya tariximizning noyob sahifalarini ochib beradi, madaniy merosimiz naqadar rang-barang va boy ekanini namoyon etadi”, deb yozgan prezident yordamchisi Saida Mirziyoyeva.
Izoh (0)