O‘zbekistonda xizmat ko‘rsatgan artist hamda Qoraqalpog‘iston Respublikasi xalq artisti Kengesboy Serjanov 66 yoshida vafot etdi. Bu haqda Madaniyat vazirligi matbuot xizmati xabar berdi.
Kengesboy Serjanov faoliyati davomida O‘zbekiston davlat konservatoriyasida, Respublika estrada-sirk kollejida yoshlarga ustozlik qilgan. Alisher Navoiy nomidagi katta akademik opera va balet teatrida opera xonandasi sifatida ijod qilib, ko‘plab bosh rollarni ijro etgan.
Kengesboy Serjanov keng diapazonli, sahroyi ovoz egasi bo‘lish bilan birga ko‘plab xalqaro tanlovlar g‘olibi bo‘ldi. Respublikamizga taniqli opera xonandalarini yetishtirishda, mamlakatimizda opera sanʼatini rivojlantirishda salmoqli hissa qo‘shdi. Kengesboy Serjanovning yorqin xotirasi mudom yodimizda saqlanadi, — deyiladi Madaniyat vazirligi ta’ziyasida.
May boshlarida O‘zbekistonda xizmat ko‘rsatgan artist Mashrab Kimsanov 69 yoshida vafot etgani to‘g‘risida xabar berilgandi. Mart oyida esa O‘zbekiston xalq baxshisi Qalandar baxshi 73 yoshida vafot etgan edi.
Izoh (0)