Toshkent viloyatining O‘rta Chirchiq tumanida 5 tup chinorni noqonuniy kesgan shaxslar ozodlikdan mahrum etildi. Bu haqda viloyat Ekologiya boshqarmasi matbuot xizmati xabar berdi.
Ma’lum qilinishicha, 2023-yilning dekabrida fuqaro o‘zining uch nafar sherigi bilan tumanning “Mashʼal” MFY hududida joylashgan fermer xo‘jaligiga qarashli dala maydoniga borib, motorli arra va boshqa ish qurollari yordamida jami narxi 247 million 180 ming so‘mlik 5 tup ko‘p yillik sharq chinorini tag qismidan noqonuniy kesib olgan.
Kesilgan daraxtlarni bo‘laklarga bo‘lib, o‘zlari yollagan “KamAZ” yuk mashinasiga joylab, Toshkent shahri hududidagi xalq tilida “Taxta bozori” deb ataluvchi bozorga sotish maqsadida olib ketilayotganida ichki ishlar xodimlari tomonidan to‘xtatib qolingan.
Sud hukmi bilan aybdor shaxsga Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan 2 yil muddatga ozodlikdan mahrum etish jazosi tayinlandi. Uning jinoiy sheriklariga ham kodeksning tegishli moddalariga asosan ozodlikdan mahrum etish jazosi tayinlandi.
Izoh (0)