Toshkent shahar Shayxontohur tumanida daraxt shoxlarini kesgan fuqaro 18 million so‘m jarima to‘laydigan bo‘ldi. Bu haqda Ekologiya boshqarmasi xabar berdi.
Ma’lum qilinishicha, 26-mart kuni Ekologiya, atrof-muhitni muhofaza qilish va iqlim o‘zgarishi vazirligi Toshkent shahar boshqarmasining Shayxontohur tumani bo‘limi mas’ullari tomonidan tuman hududi bo‘ylab navbatdagi ekologik nazorat tadbirlari amalga oshirildi. Amalga oshirilgan mazkur nazorat tadbirlari davomida Shayxontohur tumanining Abdulla Qodiriy ko‘chasi, 2-sonli uyi oldida fuqaro SH.A tomonidan yetti tup chinor daraxti shoxlari o‘sishdan to‘xtamaydigan darajada kesilgani aniqlandi.
Aniqlangan ushbu holat yuzasidan fuqaroga nisbatan davlat inspektori tomonidan Ma’muriy javobgarlik to‘g‘risidagi kodeksning 79-moddasi 1-qismi bilan ma’muriy bayonnoma rasmiylashtirilib, BHMning yigirma besh barobari (8 500 000 so‘m) miqdorida jarima hamda tabiatga yetkazilgan zarar uchun (9 520 000 so‘m) miqdorda ta’sir chorasi qo‘llandi. Mazkur fuqaro tabiatga yetkazgan zarari uchun jami miqdorda 18 020 000 so‘m to‘laydigan bo‘ldi.
Izoh (0)