O‘zbekistonning Namangan viloyatida bog‘cha bolalari va maktab o‘quvchilarini zaharlagani taxmin qilinayotgan yod xalqaro qidiruvdagi shaxs rahbarlik qilayotgan MCHJ tomonidan ishlab chiqarilgani aytilmoqda.
MCHJ rahbarining qidiruvda ekani to‘g‘risidagi ma’lumot AQSH Immigratsiya va bojxona xizmati rasmiy sayti orqali ommalashmoqda.
Qidiruvdagi o‘zbek tadbirkoriga qanday ayb qo‘yilgan?
“Samo” MCHJ asoschisi Nodir Yunusov Sog‘liqni saqlash vazirligining maktablar va bolalar bog‘chalariga antistrumin preparatini yetkazib berish bo‘yicha ko‘p milliard dollarlik tenderda g‘olib chiqqan. Yunusovga odam savdosi, qul mehnati, firibgarlik, reketchilik va korrupsiyaga uchragan tashkilot tashkil etish kabi ayblovlar qo‘yilgan.
“Daryo” mazkur xabarga aniqlik kiritish maqsadida Nodir Yunusov rahbarligidagi Zuma Pharma korxonasi saytida ko‘rsatilgan telefon raqamlari bilan bog‘landi. Mas’ullardan birining ma’lumot berishicha, ayni paytda tashkilotda barchasi joyida. Korxona xodimi jurnalistning “Nodir Yunusov ayni paytda ish joyidami?”, degan savoliga birozdan so‘ng aniqlik kiritib, javob berishini bildirdi.
Nodir Yunusov rahbarligida korxonada favqulodda yig‘ilish boshlandi
Tahririyat jurnalisti mas’ulning javobini bilish uchun korxona raqamiga takroriy qo‘ng‘iroqni amalga oshirdi. Ikkinchi marotaba qilingan qo‘ng‘iroqqa javob bergan navbatchi xodim jurnalist bilan muloqot qilgan xodimning o‘zini chaqirib berishini bildirdi. Biroq, birozdan so‘ng korxonada favqulodda yig‘ilish boshlanib qolganini, ammo yig‘ilish Nodir Yunusov rahbarligida emasligini, barcha savollarga yig‘ilishdan so‘ng javob berilishini qo‘shimcha qildi.
Zuma Pharma korxonasining Telegram’dagi rasmiy kanalida ma’lum qilinishicha, korxona rahbari Nodir Yunusov 2023-yilning 13-iyul kuni Xitoy Xalq Respublikasining “LUYe” korporatsiyasi vakillari va Farmasevtika tarmog‘ini rivojlantirish agentligi direktori Ulug‘bek Egamovni qabul qilgan.
Dastlab “LUYe” korporatsiyasi vakillari kompaniya hamda ular tomonidan ishlab chiqarilayotgan mahsulotlar haqida ma’lumotlar berib o‘tishdi. Korxonamiz rahbari Nodir Yunusov UGP guruh korxonalari haqida ma’lumot berib, Zuma Pharma korxonasini ishlab chiqarish jarayonlari, mikrobiologiya bo‘limlarini yaqindan tanishtirdi, — deyiladi korxona mas’ullarining o‘sha paytdagi axborotida.
Nodir Yunusov Zuma Pharma MCHJ rahbari sifatida “Sputnik V” vaksinasini O‘zbekistonda ishlab chiqarishni ham yo‘lga qo‘ymoqchi bo‘lgan edi.
Avvalroq Namangan viloyatida 450 nafar bola aynan shu MCHJ tomonidan ishlab chiqarilgan yoddan zaharlanib, shifoxonaga murojaat qilgani aytilgandi. Sog‘liqni saqlash vaziri o‘rinbosari Elmira Bositxonova bolalar dori yoki ovqatdan zaharlanmagan. Lekin hali buni aniqlab ulgurmadik degandi. Shu gapni OAVga aytgan mas’ul, bir vaqtning o‘zida Sog‘liqni saqlash boshqarmalari hamda “Samo” MCHJ rahbariga xat chiqarib, bolalarning shu yodni qabul qilishini vaqtincha to‘xtatib turaylik degandi.
Bolalarning zaharlanishi ortidan jinoyat ishi qo‘zg‘atilgan
Namangan viloyatida bolalar zaharlanganligi holati yuzasidan Bosh prokuratura tomonidan Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan.
“Daryo” Zuma Pharma MCHJ mas’ullarining holat yuzasidan qo‘shimcha tushuntirish berishi uchun minbar berishga tayyorligini ma’lum qilib, holatga tashkilot vakillari tomonidan aniqlik kiritiladi degan umidda.
Izoh (0)