Bugun, 23-iyul kuni Toshkent viloyati Qibray tumani “G‘afur G‘ulom” MFY Alisher Navoiy ko‘chasida joylashgan yashash uyi va qurilish mollari do‘konida yong‘in sodir bo‘ldi.
Yong‘in kuchli alangani keltirib chiqargan. Do‘kon binosi butunlay yonib ketgan, atrofni qora tutun qoplagan. Voqea joyidagi fuqarolar yong‘in o‘chirish ishlarida faollik ko‘rsatgan.
“Ko‘chaga chiqishim bilan olovni ko‘rib, qo‘rqib ketdim. Hech kimning boshiga tushmasin. Birdan tez yordam chaqirishdi, xonadonlardagi hamma bolalarni ko‘chaga olib chiqdik. Hamma qo‘ldan kelgancha yordam berdi”, deydi aholi vakillaridan biri.
Tuman FVBga yong‘in chiqqani to‘g‘risida soat 10:57 da murojaat kelib tushgan va zudlik bilan hodisa joyiga 5 ta yong‘in-qutqaruv ekipaji yetib borgan.
“Qurilish mollar do‘koni hamda yonidagi yashash xonadonlarda yong‘in bo‘layotgani haqida xabar kelib tushdi. Yong‘in soat 11:17 da qurshab olindi va 11:50 da bartaraf etildi. Yong‘in oqibatida tan jarohati olganlar yo‘q. Yashash xonadonlari va xo‘jalik mollari do‘konida umumiy hisobda 340 kvadrat maydonda binolarning tom qismi hamda ichki qismiga zarar yetgan”, deydi Toshkent viloyati Qibray tumani FVB inspektori Xayriddin Nabiyev.
“Taxminan 11:00 larda rezinaning kuygan hidi chiqa boshladi. Hamma joy tutun bo‘lib ketdi. Qo‘shni “svarka” qilgan ekan, shundan chiqdi deyishyapti. Uylarning ichi suvga to‘lib qolgan”, deydi qo‘shni xonadonda yashovchi fuqaro.
Hodisa oqibatida tan jarohati olganlar to‘g‘risida rasmiy murojaat kelib tushmagan. Biroq voqea guvohlarining aytishicha, bir fuqaroning oyog‘i yengil darajada kuygan. Yong‘inga ehtimoliy sabab sifatida payvandlash ishlarida xavfsizlikka rioya qilinmagani ko‘rsatilmoqda. Ayni vaqtda yong‘inning aniq sabablari va yetkazilgan moddiy zarar miqdori mutasaddi tashkilotlar tomonidan o‘rganilmoqda.
Yong‘in yuz bergan qurilish mollari do‘koni taxminan 10 yildan buyon faoliyat yuritib kelgan.
Izoh (0)