2025-yilda Andijon viloyati eksporti hajmini 1,5 milliard dollarga yetkazish ko‘zda tutilgan. I yarim yillikda rejaning uchdan bir qismi ham bajarilmagan. Bu haqda 28-iyul kuni prezident Shavkat Mirziyoyevga hududda amalga oshirilgan ishlar va yangi rejalar bo‘yicha berilgan axborotda maʼlum qilingan.
Prezident matbuot xizmati yig‘ilishda qator masalalar ko‘tarilganini ochiqladi. Qayd etilishicha, joriy yilda mutasaddilarga Andijon viloyatiga 3,1 milliard dollar investitsiya olib kelish, tovar va xizmatlar eksporti hajmini 1,5 milliard dollarga yetkazish vazifasi qo‘yilgan. Shu bilan birga, 305 ming fuqaro bandligini taʼminlab, 32 mingdan ziyod oilani kambag‘allikdan chiqarish ko‘zda tutilgan.
“Viloyatda yil boshidan buyon 1 milliard dollarlik yangi quvvatlar, 344 ta savdo va servis majmuasi ishga tushgan. Yana 2,5 milliard dollarlik loyihalar boshlangan”, deyiladi xabarda.
Manbaning maʼlum qilinishicha, yanvar-iyun oylarida viloyat eksporti hajmi 465 million dollar bo‘lgan. Yaʼni yarim yillik eksport oldinga qo‘yilgan 1,5 milliard dollarlik rejaning uchdan bir qismiga ham yetmagan.
Olti oy davomida hududga 850 million dollar investitsiya jalb etilgan. Mazkur ko‘rsatkich ham umumiy rejaning uchdan bir qismiga yetmaydi.
Manbaga ko‘ra, hududda 40 million dollar sarmoya evaziga Germaniya, Turkiya va Yaponiyadan robot-texnologiya olib kelib, innovatsion klinika barpo etiladi. Elchilar yordami bilan agroklaster tashkil qilishga Italiyadan 20 million yevro, zamonaviy agrologistika majmuasi qurishga Germaniyadan 25 million yevro jalb etilishi kutilmoqda. Xonobod shahri, Xo‘jaobod va Buloqboshida turistik maskanlar tashkil qilish bo‘yicha 30 dan ziyod tashabbuslar bildirilgan.
“Umuman aytganda, 1 milliard 100 million dollarlik qo‘shimcha loyihalar shakllantirilgan. Ularning natijasida 22 ming ish o‘rni, qo‘shimcha 200 million dollarlik eksport imkoniyati ochiladi”, deya qayd etgan prezident matbuot xizmati.
Davlat rahbari viloyatdagi har bir shahar va tumanga alohida yondashib, yangicha ishlash, yangi loyihalarni investitsiyasi kam hududlarga joylashtirish zarurligini taʼkidlagan. Ishsiz va ehtiyojmand oilalarni o‘qitib, ishga joylashtirish, mahallalarni jinoyatchilikdan xoli hududga aylantirish bo‘yicha ko‘rsatmalar berilgan.
Maʼlumot uchun, Andijon viloyati eksporti hajmi 2022-yilda 1 milliard 246 million dollarni tashkil etgan. 2023-yilda bu ko‘rsatkich 82 million dollar kamroq, yaʼni 1 milliard 164 million dollar bo‘ldi. 2024-yilda esa 1 milliard 191 million dollarlik tovar va xizmatlar eksporti amalga oshirildi. Joriy yilda viloyat masʼullariga eksport hajmini shundan 309 million dollarga ko‘paytirish vazifasi yuklatilgan.
Izoh (0)