O‘zbekistonda mediamahsulotlar axloqsizlikni targ‘ib qilmasligi uchun “ma’naviy ekspertiza”dan o‘tkazilishi e’lon qilingandi. Ushbu loyiha yo‘lga qo‘yilayotgani faol jamoatchilik vakillari tomonidan turlicha qarashlar bilan talqin qilinayotganiga Respublika Ma’naviyat va ma’rifat markazi munosabat bildirdi.
Unda aytilishicha, “Ma’naviyat ekspertizasi” loyihasi bolalar tarbiyasiga salbiy ta’sir ko‘rsatishi va o‘sib kelayotgan avlodning ongiga zarar yetkazishi mumkin bo‘lgan mediamahsulotlar tarqatilishini oldini olishga qaratilmoqda.
Ushbu loyiha mediakontentlarning yoshlar, ayniqsa, maktabgacha va maktab yoshidagi bolalarga ta’siridan xavotirlangan ota-onalar, ziyolilar, shuningdek, keng jamoatchilik so‘rovi, talab va tashabbuslari asosida joriy qilinmoqda.
“Ma’naviyat ekspertizasi” loyihasi media mahsulotlarga senzura qo‘ymaydi. Ekspertlarning faoliyati media kontent ishlab chiquvchilar, ijodiy guruhlar va badiiy kengashlar uchun tavsiyaviy “takliflar ishlab chiqishdan iborat bo‘ladi.
“Bunda ommaviy axborot vositalari, jurnalistlar, ijodkorlar, blogerlarning ijod erkinligiga daxl qilinmaydi”, deyiladi munosabatda.
Ma’naviyat va ma’rifat markazi rahbari Otabek Hasanov e’lon qilgan axborotga ko‘ra, tele va radiokanallar hamda ijtimoiy tarmoqlar uchun tayyorlanayotgan mediamahsulotlar, xususan, serial, multfilm, kino va qo‘shiqlarni “ma’naviyat ekspertizasi”dan o‘tkazish tartibi Ma’naviyat va ma’rifat markazi, AOKA, Madaniyat vazirligi, Kinematografiya agentligi, MTRK, O‘zbekiston Milliy media birlashmasining qarori bilan joriy etildi.
“Ma’naviyat ekspertizasidan o‘tkazish tartibi to‘grisida”gi nizom tasdiqlangan bo‘lib, unga muvofiq, ma’naviyat ekspertiza guruhining asosiy vazifalari belgilandi.
Jumladan, soha mutaxassislaridan tarkib topgan guruh tomonidan O‘zbekiston hamda xorijda ishlab chiqilgan va O‘zbekiston hududida namoyish etilayotgan media mahsulotlarning davlat siyosati, davlat ramzlari, milliy va umuminsoniy qadriyatlar, ma’naviy-axloqiy mezonlarga zid, insoniy fazilatlarga tahdid soluvchi axloqsizlik, behayolikni targ‘ib etuvchi holatlar mavjud-mavjud emasligi o‘rganiladi.
Yoshlar tarbiyasi va milliy mentalitetga rahna soluvchi media mahsulotlarning tarqatilishini oldini olish choralari ko‘riladi. Bunday media mahsulotlarning namoyish etilishini to‘xtatish bo‘yicha tegishli vazirlik, idora va tashkilotlarga takliflar kiritib boriladi.
Izoh (0)