Ўзбекистонда медиамаҳсулотлар ахлоқсизликни тарғиб қилмаслиги учун “маънавий экспертиза”дан ўтказилиши эълон қилинганди. Ушбу лойиҳа йўлга қўйилаётгани фаол жамоатчилик вакиллари томонидан турлича қарашлар билан талқин қилинаётганига Республика Маънавият ва маърифат маркази муносабат билдирди.
Унда айтилишича, “Маънавият экспертизаси” лойиҳаси болалар тарбиясига салбий таъсир кўрсатиши ва ўсиб келаётган авлоднинг онгига зарар етказиши мумкин бўлган медиамаҳсулотлар тарқатилишини олдини олишга қаратилмоқда.
Ушбу лойиҳа медиаконтентларнинг ёшлар, айниқса, мактабгача ва мактаб ёшидаги болаларга таъсиридан хавотирланган ота-оналар, зиёлилар, шунингдек, кенг жамоатчилик сўрови, талаб ва ташаббуслари асосида жорий қилинмоқда.
“Маънавият экспертизаси” лойиҳаси медиа маҳсулотларга цензура қўймайди. Экспертларнинг фаолияти медиа контент ишлаб чиқувчилар, ижодий гуруҳлар ва бадиий кенгашлар учун тавсиявий “таклифлар ишлаб чиқишдан иборат бўлади.
“Бунда оммавий ахборот воситалари, журналистлар, ижодкорлар, блогерларнинг ижод эркинлигига дахл қилинмайди”, дейилади муносабатда.
Маънавият ва маърифат маркази раҳбари Отабек Ҳасанов эълон қилган ахборотга кўра, теле ва радиоканаллар ҳамда ижтимоий тармоқлар учун тайёрланаётган медиамаҳсулотлар, хусусан, сериал, мультфильм, кино ва қўшиқларни “маънавият экспертизаси”дан ўтказиш тартиби Маънавият ва маърифат маркази, АОКА, Маданият вазирлиги, Кинематография агентлиги, МТРК, Ўзбекистон Миллий медиа бирлашмасининг қарори билан жорий этилди.
“Маънавият экспертизасидан ўтказиш тартиби тўгрисида”ги низом тасдиқланган бўлиб, унга мувофиқ, маънавият экспертиза гуруҳининг асосий вазифалари белгиланди.
Жумладан, соҳа мутахассисларидан таркиб топган гуруҳ томонидан Ўзбекистон ҳамда хорижда ишлаб чиқилган ва Ўзбекистон ҳудудида намойиш этилаётган медиа маҳсулотларнинг давлат сиёсати, давлат рамзлари, миллий ва умуминсоний қадриятлар, маънавий-ахлоқий мезонларга зид, инсоний фазилатларга таҳдид солувчи ахлоқсизлик, беҳаёликни тарғиб этувчи ҳолатлар мавжуд-мавжуд эмаслиги ўрганилади.
Ёшлар тарбияси ва миллий менталитетга раҳна солувчи медиа маҳсулотларнинг тарқатилишини олдини олиш чоралари кўрилади. Бундай медиа маҳсулотларнинг намойиш этилишини тўхтатиш бўйича тегишли вазирлик, идора ва ташкилотларга таклифлар киритиб борилади.
Изоҳ (0)