Berlin yaqinidagi Tesla zavodining kengaytirilishiga qarshi chiqqan iqlim faollari daraxtlarga chiqib olib, pastga tushishdan bosh tortmoqda. Bu haqda Spiegel jurnali mahalliy politsiyaga tayanib xabar berdi.
Huquq-tartibot idoralari xodimlari ekofaollarni daraxtdan olib tushish harakatlarini boshlashga tayyorlanmoqda.
“Tesla zavodining kengayishiga qarshi bo‘lgan namoyishchilarni daraxtlardan olib tushish bo‘yicha politsiya operatsiyasi bugun davom etadi. Ba’zi faollar lager hududini tark etishdan bosh tortgan holda hamon shoxlar yoki daraxtlar ustida o‘tirishibdi”, deyiladi maqolada.
Dastlab, faollar lagerning bir qismini vaqtincha bo‘shatishlari kerak edi. Bu vaqt oralig‘ida hududdagi yerlarda portlovchi eski snaryadlar mavjudligini tekshirish rejalashtirilgandi. Biroq Gryunhayd rasmiylari “jamoat xavfsizligiga rioya qilinmagani va tartibning buzilgani” tufayli o‘rmonga kirishni butunlay taqiqladi.
Atrof-muhit faollari Tesla kompaniyasining kengayishi uchun 100 gektardan ortiq o‘rmonning kesilishiga qarshi chiqmoqda. Fevral oyida ular Berlin yaqinida lager qurib olib, namoyish o‘tkazishga kirishdi.
Bir kun oldin politsiya lagerni tozalashni boshladi. Faollarning aksariyati huquq-tartibot xodimlari paydo bo‘lganidan keyin o‘z ixtiyori bilan ketishgan, biroq ba’zilari yashiringan joylarini tark etishdan bosh tortgan.
Avvalroq AQSHda o‘lim bilan tugagan YTH sabab 2,5 mlnga yaqin Tesla avtomobili qayta tekshirilishi ma’lum qilingandi.
Izoh (0)