AQSH saylovlarida g‘olib chiqqan Donald Tramp raqibi Kamala Harrisning saylovoldi kampaniyasi davomida yuzaga kelgan qarzini to‘lashni taklif qildi. Bu haqda u Truth Social tarmog‘ida ma’lum qildi.
“2020-yilgi prezidentlik saylovlarida qat’iy va jasoratli kurash olib borgan demokratlar rekord miqdorda pul to‘plagan bo‘lsalar ham, bir uyum dollar qoldirmaganlariga juda hayronman. Ham partiya, ham zaruriy birlik maqsadida buni amalga oshirishni qat’iy tavsiya qilaman. Bizda hali ham ko‘p pul bor”, dedi u.
Trampning bayonotiga Politico jurnalisti Kristofer Kadelagoning ma’lumoti sabab bo‘ldi. U manbalarga tayangan holda, Kamala Harrisning saylovoldi kampaniyasi kamida 20 million dollar qarz bilan yakunlanganini aytdi. Harris jami 1 milliard dollardan ko‘proq mablag‘ to‘plagan, 16-oktyabrga kelib uning hisobida 118 million dollar bor edi.
Tramp va Harris saylovga necha pul sarfladi?
Sentyabr oyi oxirida The Wall Street Journal ikkala nomzodning shtablari saylovoldi kampaniyasiga sarflagan xarajatlarini solishtirdi. O‘sha paytda Harris va Baydenning xarajatlari 743 million dollardan ortiq, Trampniki esa 426 million dollardan ortiq edi. Ikkala nomzod uchun ham reklama va pochta jo‘natmalari xarajatning asosini tashkil etgan.
Dunyoning eng boy odamlaridan Ilon Mask (Forbes ma’lumotlariga ko‘ra, boyligi 304 milliard dollar) Trampning saylovoldi kampaniyasiga sezilarli yordam ko‘rsatdi. Respublikachi g‘alabasidan so‘ng Tesla aksiyalari ko‘tarilib, Maskning boyligi 26 milliard dollarga oshdi.
The New York Times gazetasiga ko‘ra, tadbirkor Trampni qo‘llab-quvvatlagan America PAC superqo‘mitasiga taxminan 120 million dollar mablag‘ sarflagan. Bu mablag‘ning bir qismi “so‘z erkinligi va qurol olib yurish huquqi”ni qo‘llab-quvvatlash uchun petitsiyaga imzo chekkan tasodifiy saylovchilarga 1 million dollardan to‘lash uchun ishlatilgan.
Izoh (0)