Amerikalik aktyor, rejissyor va tadbirkor Jorj Kluni ko‘p jihatdan omadli inson. U kinoindustriyada ajoyib karyera yaratdi, muvaffaqiyatli biznes asoschisi bo‘ldi, dunyoning eng chiroyli joylarida ko‘chmas mulk sotib oldi va baxtli oilaning boshlig‘iga aylandi. Bundan tashqari, Kluni ko‘plab nufuzli unvonlarga ega — eng ko‘p haq to‘lanadigan aktyordan tortib, dunyoning eng jozibador erkagigacha. Biroq Kluni millionlarini hashamatli yaxtalar yoki shaxsiy samolyotlarga sarflamaydi — u xotini bilan vaqt o‘tkazishni va mototsiklda sayr qilishni ma’qul ko‘radi.
To‘rt yil ichida bir milliard dollar
Oxirgi bir necha yil ichida Jorj Kluni hech qanday blokbasterda suratga tushmagan bo‘lsa-da, 2018-yilda Forbes jurnali uni dunyoning eng ko‘p haq to‘lanadigan aktyori deb tan oldi. Bunday maqomga u tekila brendi — aniqrog‘i, 2013-yilda tadbirkor Randi Gerber (model Kayi Gerberning otasi) va ko‘chmas mulk magnati Mayk Meldman bilan birgalikda ishga tushirgan Casamigos Tequila brendi tufayli erishgan.
Bu g‘oya ularda Meksikada birga ta’tilga chiqishganida paydo bo‘lgan. Mahalliy barlardagi tekilani tatib ko‘rgan do‘stlar o‘zlariga mos ichimlik yaratmoqchi bo‘lgan. Ular Meksikada alkogol ishlab chiqaruvchi kompaniya topib, tekila namunalarini uyga yetkazib berishni buyurtma qilishgan.
Dastlab ichimlikni faqat o‘zlari, do‘stlari va oilalari uchun ishlab chiqarishni rejalashtirishgan. Biroq 1000 dan ortiq ichimlik buyurtma qilinganda, ishlab chiqaruvchi litsenziya olishni talab qilgan.
2011-yil may oyida tadbirkorlar tekila sotish uchun birinchi savdo belgisini ro‘yxatga olishga ariza bergan, dekabrda esa birinchi shiorlarini e’lon qilishgan: “It could happen. Please drink responsibly” (“Hamma narsa bo‘lishi mumkin. Iltimos, mas’uliyat bilan iching”). Yana bir yil o‘tib, ularda logotip va ikkinchi shior paydo bo‘ladi: “Brought to you by those who drink it” (“Aynan shuni ichadiganlar sotadi”).
“Bu bizning brendimiz va unga egalik qilamiz. Pullarimiz shu brend ortidan kelgan”, dedi Rendi Gerber intervyularidan birida. Bu so‘zlari bilan u mahsulot rasmiy ravishda keng ommaga taqdim etilishidan oldin savdo belgisini ro‘yxatga olishning ahamiyatini ta’kidlagan.
Bir necha yil o‘tib, hamkorlar kompaniyalarini dunyodagi eng yirik alkogol distribyutori Diageo’ga bir milliard dollarga sotishdi. Bitim ularga 700 million dollar avans olib keldi, qolgan 300 million esa brendning keyingi 10 yil ichidagi faoliyati natijalariga qarab to‘lanadi. Hozirga kelib Casamigos Tequila qiymati uch baravar oshdi. 2022-yilda kompaniya spirtli ichimliklar brendlari ichida eng tez o‘sayotgan brendga aylandi.
Saxiy va jozibador
Gollivudning barcha yulduzlari kabi Kluni ham Omega soatlari va Fiat kabi global brendlar bilan reklama shartnomalaridan katta pul topadi. Shuningdek, Jorj Kluni Nespresso qahva kompaniyasining yuziga aylanganiga deyarli 15 yil bo‘ldi — bu vaqt ichida u oddiy mahsulotni premium xalqaro brendga aylantirdi.
Biroq aktyor hamma takliflarga ham rozi bo‘lavermaydi — hatto bu takliflar o‘nlab million dollarni o‘z ichiga olsa ham. Bir safar u reklamada ishtirok etishdan voz kechadi — bu unga 35 million dollar keltirardi. Klunini aytishicha, bu taklifni bergan aviakompaniya esa “ittifoqchi bo‘lib, lekin ba’zida shubhali” davlatga tegishli ekan.
“Men bu haqda xotinim bilan gaplashdim va xotirjamligimiz bu pullarga arzimaydi, deb qaror qildik”, deydi u.
Kluni filmdagi roli uchun o‘rtacha 20 million dollar gonorar oladi. Masalan, “Betmen” haqidagi fantastik jangovar filmdagi gonorari 10 million dollarni, “Oushenning 11 do‘sti”da 15 million dollar, “Oushenning 13 dugonasi” filmidagi roli uchun esa 20 million dollarni tashkil etgan.
Shu bilan birga, Jorj Kluni chinakam saxiy do‘st. Aktyorning biznes hamkori Rendi Gerber bir safar Kluni 14 eng yaqin do‘stining har biriga bir million dollar tarqatganini aytadi. U bu pullarni Tumi brendining premium sumkalariga solib, naqd pul sifatida sovg‘a qilgan. Mashhur aktyor bu faktni tasdiqlab, 52 yoshida ham oilasi yo‘q bo‘lsa-da, lekin 35 yil davomida unga yordam bergan do‘stlari borligini tushuntiradi.
Endi u beva emas
Lekin bir yil o‘tgach, Gollivudning eng jozibador va saxiy erkagi inson huquqlari faoli Amal Alamuddin bilan tanishdi. O‘shanda Klunining agenti juftlikning kelajagini bashorat qilib, Amal Alamuddin uning turmush o‘rtog‘i bo‘lishini aytadi. Birinchi uchrashuvdan to‘qqiz oy o‘tgach, aktyor yuristga 750 ming dollarlik olmos uzuk hadya qilib, unga turmushga chiqish taklifini beradi.
Amalning tan olishicha, Jorj bilan uchrashishdan oldin 35 yoshida u qari qiz bo‘lib o‘tsam kerak, deb o‘ylagan. Biroq 2014-yil 27-sentyabrda u mehmonlar oldida 12 metrli Oskar de la Renta to‘y libosida porlagan, ushbu libos 380 ming dollar turadi. Bu nafis to‘y kiyimi Oskar de la Renta karyerasidagi so‘nggi asar bo‘lib, mashhur mijozining to‘yidan bir oy o‘tmay, dizayner vafot etgan. Tadbir yangi kelin-kuyovga 4,6 million dollarga tushgan.
2017-yilda Jorj va Amal egizaklar — Aleksandra va Ella ota-onasi bo‘lishdi, bir necha yil o‘tgach esa Kaliforniyadan ko‘chib, Fransiyada yashashga qaror qilishadi. Aktyor Pransaning mashhur Provans mintaqasida XVIII asrga tegishli Domain du Canadel uyini sotib oladi — bu yerda Elton Jon, Jonni Depp va Bred Pitt kabi qo‘shnilari bilan yashaydi. Katta bog‘, tennis korti va uzumzorli bu uy unga 8,5 million dollarga tushgan.
Ko‘chib o‘tishiga qaramay, aktyor AQSH, Buyuk Britaniya va Italiyadagi ko‘chmas mulkni saqlab qolmoqda. U Nyu York va Los-Anjelesda ham kvartiralarga ega. Ammo bo‘lajak rafiqasi bilan birinchi marta uchrashgan Komo ko‘li bo‘yida joylashgan 25 xonali villasini 107 million dollarga sotishga qaror qiladi.
Kluni Chevrolet Corvette, Porsche 911, Porsche Carrera, Lexus LS, Tesla Roadster va Tango T600 kabi superkarlar kolleksiyasiga ham ega. Biroq aktyor ko‘proq Harley-Davidson motosiklini boshqaradi, shuningdek, Piaggio va Yamaha X-Maxx skuterlarini ham minib yuradi. Jorj tezlikni juda yaxshi ko‘radi, shu sababdan ham bir necha bor jiddiy avtohalokatlarga uchragan. Masalan, 2018-yilda Sardiniya orolidagi yo‘llardan birida 120 kilometr soat tezlikda mashinaga urilib, ruldan uchib ketgan.
Badavlat bo‘lishiga qaramay, Jorj Kluni juda kamtarona yashaydi. U hashamatli yaxtalar, shaxsiy samolyotlar sotib olmaydi va kechki ovqat uchun yuz minglab dollar sarflamaydi. Ko‘chmas mulk xarajatlarini esa u xarajat sifatida emas, balki investitsiya sifatida ko‘radi. Buning o‘rniga, Kluni ko‘plab resurslarni jamoatchilik va xayriya faoliyatiga sarflaydi, BMTning yaxshi niyat elchisi bo‘lib xizmat qiladi.
2010-yilda aktyor Gaitida zilzila qurbonlari uchun mablag‘ yig‘ishni tashkil etadi, 2012-yilda esa Sudan elchixonasi oldida norozilik namoyishida qatnashadi. U mamlakatdagi bolalarning og‘ir ahvoliga e‘tibor qaratadi va shu sababdan hibsga olinadi. Kluni, shuningdek, Livandagi maktablarga Suriyadan kelgan uch ming qochqin bolaning ta’lim olishi uchun 250 ming dollar ajratadi va qurolni erkin sotish taqiqiga qaratilgan tashkilotlarga 500 ming dollar ajratadi.
Klunining Gollivuddagi Shon-sharaf xiyobonida shaxsiy yulduzi yo‘q. U tantanali marosimda ishtirok etish va buning uchun 30 ming dollar to‘lashdan bosh tortadi.
“Jorj orzu hayotini kechirmoqda: u sog‘lom, sevimli ishi bilan shug‘ullanmoqda va ajoyib oilaga ega”, dedi 2024-yilda aktyorga yaqin manba.
Manbaning aytishicha, Amal Fransiyadagi qishloqqa ko‘chishni xohlaganda, Kluni biroz ikkilanib qolgan, ammo oxir-oqibat rozi bo‘lgan va xato qilmagan. Ular har hafta pitssa kechasi o‘tkazish, yaqindagi Kotinyak qishlog‘idagi mahalliy galereyalarni tomosha qilish va sevimli senbernar zotli iti Nelsonni sayrga olib chiqishdan iborat ideal kun tartibini yaratdi.
Izoh (0)