“Kambag‘allikdan farovonlik sari” dasturini amalga oshirishga faol nuroniylarni jalb etish chora-tadbirlari to‘g‘risida”gi prezident qarori qabul qilindi.
Qaror bilan mahallalarda katta hayotiy tajribaga ega bo‘lgan obro‘-e’tiborli uch nafar faol nuroniy beshta kambag‘al oilaga olti oyga biriktiriladi. “Mahalla yettiligi” oilalarning ijtimoiy-iqtisodiy ahvolini yaxshilashda faol nuroniylarga yaqindan yordam beradi.
Oilalarni kambag‘allikdan chiqarishda nuroniylarning asosiy faoliyat yo‘nalishlarida quyidagilar amalga oshiriladi:
- xonadon tomorqasidan samarali foydalanish va kichik ishlab chiqarish uskunalari va boshqa zarur texnika vositalarini bo‘lib to‘lash sharti bilan ijaraga olishga yordamlashish;
- oila farzandlarini hunarmand va ustalarga shogirdlikka biriktirish, shuningdek, ushbu oilalarning ta’lim muassasalarida o‘qiyotgan farzandlarini o‘quv jihozlari va qurollari hamda sport kiyimlari bilan ta’minlash;
- piyoda yurish madaniyatini targ‘ib qilish;
- keksa yoshdagi fuqarolar uchun mos keladigan sport tadbirlarini tashkil etish, ularni jismoniy tarbiya va sport bilan shug‘ullanishga jalb etish.
Faol nuroniylarning tavsiyasiga muvofiq kambag‘al oila farzandlarining ta’lim olishlari uchun qulay shart-sharoit yaratish maqsadida o‘quv jihozlari va qurollari hamda sport kiyimlarini xarid qilish xarajatlari “Nuroniy” jamg‘armasi mablag‘lari hisobidan qoplab beriladi.
Har bir mahallada “Nuroniylar va ona-onalar kengashi” tashkil qilish orqali mahallalarda ijtimoiy-ma’naviy muhit barqarorligi ta’minlanadi. Nuroniylar muammoli va boqimandalik kayfiyatiga tushib qolgan oilalar bilan ham ishlashi lozim.
Faol nuroniylar har oyda mehnatga haq to‘lashning eng kam miqdori (1 mln 155 ming so‘m)ning 50 foizi — 577 500 so‘m miqdorida rag‘batlantirib boriladi.
Ushbu qarorda belgilangan vazifalarni amalga oshirish maqsadida 2025-yil uchun davlat byudjeti parametrlarida 504 milliard so‘m mablag‘ ajratiladi. Keyingi yillarda ham zarur mablag‘lar ajratib boriladi.
O‘zbekistonda kambag‘allikni qisqartirish
Shavkat Mirziyoyev mahallalarda kambag‘allikni qisqartirish, kambag‘al oilalar bilan ishlash tizimini yangi bosqichga olib chiqish chora-tadbirlari yuzasidan 2024-yilning sentyabrida o‘tkazgan videoselektor yig‘ilishida O‘zbekistonda kambag‘allikni qisqartirish umummilliy harakatga aylanishini, “Kambag‘allikdan farovonlik sari” dasturi tayyorlanayotganini aytgandi. Dastur shu yilning o‘zida 500 ming, 2025-yilda yana 1 million kishini kambag‘allikdan chiqarishga qaratilgan.
24-sentyabr kuni “Kambag‘allikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish to‘g‘risida”gi prezident farmoni qabul qilindi. Hujjat bilan “Kambag‘allikdan farovonlik sari” dasturi amalga oshirilishi belgilandi.
Shavkat Mirziyoyev mahallalarda kambag‘allikni qisqartirish, kambag‘al oilalar bilan ishlash tizimini yangi bosqichga olib chiqish chora-tadbirlari yuzasidan 11-sentyabr kuni o‘tkazilgan videoselektor yig‘ilishida “Odamlarga qancha yordam bermaylik, mahallalar sharoitini yaxshilamasak, kambag‘allik qisqarmaydi”, deb aytgandi.
Shu bois kelgusi yilda mahallalar infratuzilmasini rivojlantirishga barcha manbalardan 1,6 milliard dollar ajratiladi. Bu mablag‘larning 1,2 trillion so‘mi, avvalo, eng og‘ir 300 ta mahallada suv nasoslari va quyosh panellari o‘rnatishga beriladi. Yana 2 trillion so‘m hisobidan eng og‘ir 500 ta mahallada elektr, yo‘l, internet va boshqa infratuzilma masalalari hal etiladi.
O‘zbekistonda kambag‘allikni qisqartirish va aholini ijtimoiy himoya qilish maqsadida kelgusi yili byudjetdan 500 milliard so‘m yo‘naltiriladi. Bu haqda davlat rahbari 19-noyabr kuni Senatning parlament saylovidan keyingi birinchi majlisida e’lon qilgan.
Izoh (0)