O‘zbekistonda aholi jon boshiga daromad 3 ming dollarga yetishi kutilmoqda (2018-yilda – 1 ming 600 dollar bo‘lgan). Bu haqda Shavkat Mirziyoyev 20-noyabr kuni Qonunchilik palatasi majlisida aytib o‘tdi.
Majlis bosh vazir lavozimiga nomzodni ko‘rib chiqish va Vazirlar Mahkamasining yaqin va uzoq istiqbolga mo‘ljallangan harakatlar dasturi muhokamasiga bag‘ishlangandi. Asosiy masalaga o‘tishdan oldin prezident o‘tgan 5 yilda har tomonlama o‘ylab qabul qilingan dasturlar ijrosi qanday ta’minlangani haqida to‘xtalib o‘tdi.
Davlat rahbarining so‘zlariga ko‘ra, iqtisodiyoti ikki karra o‘sib, 100 milliard dollarlik tarixiy marradan oshdi. Jahon banki 2024-yilda O‘zbekiston Yevropa va Markaziy Osiyoda iqtisodiyoti eng tez o‘sayotgan 3 ta davlat qatoridan joy olganini e’tirof etdi. Kambag‘allik darajasi so‘nggi 4 yilda 23 foizdan 11 foizga tushdi. Bu yil 9 foizga tushishi kutilmoqda.
Eksport qariyb 2 barobar o‘sib, ilk bor 25 milliard dollardan, oltin-valyuta zaxiralari esa 40 milliard dollardan oshdi. O‘zlashtirilgan xorijiy investitsiyalar hajmi 6 karra ko‘payib, buning hisobiga 1,5 millionta yuqori daromadli ish o‘rinlari yaratildi. Yalpi ichki mahsulotda investitsiyalar ulushi 30 foiz darajasida ta’minlandi.
Prezident jahon miqyosida hukm surayotgan bugungi o‘ta keskin va og‘ir sharoitda O‘zbekistonda tinchlik va hamjihatlikni saqlab, iqtisodiyotda barqaror o‘sishni ta’minlash oson bo‘lmaganini ta’kidladi.
Shavkat Mirziyoyev yangi hukumat, barcha rahbarlar birgalikda qattiq ishlab, islohotlar shiddatini pasaytirmasdan, ijtimoiy, iqtisodiy va siyosiy hayotdagi o‘zgarishlarni davom ettirsa, 2030-yilga borib, iqtisodiyot hajmini 200 milliard dollarga yetkazish mumkinligiga ishonch bildirdi.
“Yana bir bor aytaman, bunday natijalarga erishish uchun kuch va imkoniyatimiz ham, salohiyatimiz ham yetadi!” dedi prezident.
Bu natijani ta’minlash orqali aholining turmush darajasi va sifatini keskin yaxshilashga erishiladi.
Izoh (2)
Nimaga 2016-yil oxirida 85 mlrd 1ekonomika, 32 ml aholiga va aholi jon boshiga 2650 $dan to'g'ri kelgan iqtisodiyot 2024-yilga kelibgina 100 mlrddan oshdi. O'tgan 8 yildagi inflatsiya va aholining 37 mlnga yetdi va 100 mlrd ekonimika aholi jon boshiga 2700 $ dan to'g'ri kelishi bizni 8 yil oldingi aholidan atigi 50 $ga b9yroq bolganimizni anlatadimi? Nima uchun 2016-yildagi 2650 $ 2018-yilda 1600 $ga tushib qolgan? Va inflatsiyan8 hisobgabolgan holdan biz qanday qilib 2016-yildagi aholiga qaraganda boyroqmiz deya olamiz? Bunga qanday izoh bera olasiz.
Hammasi qog'ozda hammasi bo'lmagan gaplar, masalan bizni shaharda 95% dan ham ko'proq erkak chet elda, erkak deyarli qolmagan, davlatni hech qanday yordami tegmagan, hech qachon gazni ko'rmaganmiz, ko'chalar juda og'ir ahvolda, svet har kuni uchadi, bolalar kasal, Ota onalar asabiy, hamma hayotdan charchagan, bu kottakonlar, majlislarda qog'ozga o'zlari yozgan sonlariga o'zi ishonib maqtanaveradi, Javobini butun xalq qiyomatda so'rasin, yoqasidan olib, biz chet elda yurib kambagallikni qisqartirmasak, O'zbekiston o'g'rilik, jinoyat bo'yicha 1-o'ringa chiqadi