Toshkentdan shahridan ta’tilga otlanayotgan talabalar uchun qo‘shimcha avtobus yo‘nalishlari tashkil etilishi mumkin. Bu haqda Oliy ta’lim, fan va innovatsiyalar vazirligi ma’lum qildi.
Vazirlik axborot xizmatining xabar berishicha, 19-dekabr kuni Oliy ta’lim, fan va innovatsiyalar vaziri Qo‘ng‘irotboy Sharipov ishtirokida yig‘ilish o‘tkazilgan. Unda talabalarning qishki ta’til davrini mazmunli tashkil etish, ularning ta’tilni o‘z oilalari davrasida o‘tkazishlari uchun zarur shart-sharoitlar yaratish masalasi muhokama qilingan.
Ma’lum qilinishicha, qishki ta’til boshlanishi munosabati bilan Toshkent shahridan hududlarga jo‘nab ketadigan 118 mingga yaqin talabaning o‘z uylariga xavfsiz yetib borishi va qaytib kelishi uchun Transport vazirligi hamkorligida amaliy choralar ko‘rilmoqda.
“12-dekabrdan boshlab 50 foiz chegirmaga ega imtiyozli chiptalar avia va temiryo‘l kassalari hamda avtovokzallarda sotish boshlangan bo‘lib, qo‘shimcha ravishda O‘zbekiston milliy, Toshkent davlat iqtisodiyot va Toshkent davlat agrar universitetlarida sayyor kassalar tashkil etildi.
Bundan tashqari, 26-dekabrga qadar ehtiyojga ko‘ra Transport vazirligi bilan hamkorlikda qo‘shimcha avtobus hamda temir yo‘l poyezdlari qatnovlari yo‘lga qo‘yiladi”, deyiladi xabarda.
Ta`kidlanishicha, Toshkent shahridan hududlarga bir yo‘nalishda jo‘nab ketish istagini bildirgan talabalar soni 40 nafardan oshganda, Transport vazirligi tomonidan avtobus tashkil etib berilishi ma’lum qilingan.
Avvalroq “O‘ztemiryo‘lyo‘lovchi” AJ kassalar va ilovada chiptalar qolmagani haqidagi xabarlarga munosabat bildirgandi.
Ma’lumot uchun, Oliy ta’lim, fan va innovatsiyalar vazirligining tegishli buyrug‘i bilan oliy ta’lim tashkilotlari talabalari, texnikum, kollej, kasb-hunar maktabi va akademik litseylar o‘quvchilariga 2024/25-o‘quv yili uchun beriladigan qishki ta’til 2024-yilning 25-dekabridan boshlanadi va 2025-yilning 7-yanvariga qadar (shu kuni ham) davom etadi.
Izoh (0)