Namangan viloyati Chortoq tumanidagi maktab direktori o‘z xizmat xonasida qimor o‘yini tashkil etgani aniqlandi.
Viloyat Maktabgacha va maktab ta’limi boshqarmasi matbuot xizmatining ma’lum qilishicha, 17-dekabr kuni Namangan viloyati Chortoq tumani IIB xodimlari tomonidan o‘tkazilgan reyd natijasida 8-umumiy o‘rta ta’lim maktabi direktori o‘z xizmat xonasida qimor o‘yini tashkil etib, sheriklari bilan o‘ynayotgani aniqlangan.
Hozirda holat yuzasidan tuman IIB tomonidan tergovga qadar surishtiruv ishlari olib borilmoqda. Tashkilotda o‘rnatilgan ichki mehnat tartib qoidalarini qo‘pol ravishda buzgani uchun maktab direktori bilan tuzilgan mehnat shartnomasi ish beruvchi tashabbusiga ko‘ra bir tomonlama bekor qilingan.
Navoiy viloyati Nurota tumanidagi maktabda ham shu kabi holat kuzatilgandi. Maktab direktori va o‘quv ishlari bo‘yicha o‘rinbosari qorovulxonada qimor o‘ynab o‘tirgani uchun ishdan bo‘shatilgandi.
Izoh (0)