Toshkent viloyatining Oqqo‘rg‘on tumanida yashovchi 31 yoshli fuqaro IIB xodimlari tomonidan dastlab Bo‘ka tumaniga, undan Bekobodga olib ketilgan. Ko‘p o‘tmay uning vafot etgani ma’lum bo‘ldi. Marhumning yaqinlari u IIB xodimlarining kaltaklashi oqibatida vafot etganini aytmoqda. Viloyat IIB axborot xizmati esa mast fuqaroning mashinadan sakrab tushishi uning bosh miya suyagi sinishiga va tibbiy yordam ko‘rsatilishiga qaramay vafot etishiga sabab bo‘lgan.
O‘g‘lim To‘raxonni 2024-yilning 26-iyul kuni Bobur va Obid ismli “uchastkavoy”lar PPS xodimlarini chaqirib, yarim kechasi Bo‘kaga olib ketishgan. Nima bo‘lgan bo‘lsa, hammasi yo‘lda bo‘lgan, deydi tahririyatga bu haqda ma’lumot bergan marhumning otasi Sobir aka.
Otaning bildirishicha, o‘g‘li IIB xodimlari tomonidan dastlab “VAZ 2107” avtomobilida Oqqo‘rg‘on tuman IIBga, undan shifoxonaga olib ketilgan. So‘ng Bo‘ka tumaniga ketilgan.
Biz ertasi kuni Bo‘ka tumaniga bordik. U yerga borsak, o‘g‘limni Bekobod tumanidagi shifoxonaga o‘lik holda olib ketishgan ekan. O‘g‘limning yuzlari shishib, boshi yorilgan bo‘lgan, deydi Sobir aka.
Marhumning yaqinlariga ko‘ra, voqea bosdi-bosdi qilinishi mumkin.
Toshkent viloyati IIBB axborot xizmatining “Daryo”ga ma’lum qilishicha, joriy yilning 26-iyul kuni soat 01:30 larda Oqqo‘rg‘on tumani “Qo‘shtepa” mahallasi hududida o‘zaro janjallashayotgan to‘rt nafar fuqaroni shu hududda tungi xizmatga jalb qilingan IIO xodimlari tinchlantirishga harakat qilgan.
Shu vaqtda ulardan biri 1993-yilda tug‘ilgan T.M. (mastlik holatida bo‘lgan) xodimlarning qonuniy talablarini bajarmasdan, baqir-chaqir qilib, janjalni davom ettirgan. Shundan so‘ng holat yuzasidan hujjatlar rasmiylashtirilib, fuqaro T.M. Oqqo‘rg‘on tumani tibbiyot birlashmasiga olib borilgan va ekspertizadan o‘tkazilgan. Fuqaroda mastlik holati tasdiqlangach, uni tibbiyot hushyorxonasiga joylashtirish maqsadida xizmat avtomashinasida olib ketilayotgan vaqtda, fuqaro mashinaning orqa eshigini birdan ochib, harakatlanayotgan transport vositasidan tashqariga sakragan. Oqibatda tan jarohatlari olgan, deydi Toshkent viloyati IIBB axborot xizmati rahbari.
Mas’ulga ko‘ra, jarohat olgan fuqaroga xodimlar tomonidan birinchi tibbiy yordam ko‘rsatilib, u Bo‘ka tumani tibbiyot birlashmasiga olib borilgan.
Oradan vaqt o‘tib ko‘rsatilgan tibbiy yordamga qaramay, fuqaro shifoxonada vafot etdi. Hozirda holat prokuratura organlari tomonidan o‘rganilmoqda, deydi mas’ul.
Viloyat IIBB axborot xizmati mas’uli fuqaroning IIB xodimlari tomonidan urib o‘ldirilganini inkor etib, “Ijtimoiy tarmoq faollari va OAV vakillaridan axborotni (fuqaro IIO xodimlari tomonidan kaltaklab o‘ldirildi mazmunida) noto‘g‘ri talqin qilmasliklarini so‘raymiz, dedi.
Izoh (0)