Afg‘onistonning Hilmand viloyatida 45 yoshli erkak yetti yashar qizga uylandi. Kuyovning allaqachon ikkita xotini borligi aytilmoqda. Bu haqda Tolo News xabar berdi.
To‘y marosimi Marja tumanida bo‘lib o‘tgan, bolaning otasi pul evaziga nikohga rozi bo‘lgan. “Tolibon” vaziyatdan xabar topgach, jarayonni vaqtincha to‘xtatgan. Ikkala erkak ham qisqa muddatga hibsga olingan, ammo jinoiy javobgarlikka tortilmagan.
“Tolibon” erkakka qizni uyga olib ketishdan oldin 9 yoshga to‘lishini kutishni buyurgan, deydi manbalar.
Marosimdan olingan suratlarda erkakning yosh qiz yonida ko‘ringani aks etgan. Bu huquq himoyachilari orasida norozilik uyg‘otgan. Ularning aytishicha, bu holat Afg‘oniston janubida, xususan, Hilmand, Qandahor va Zobul kabi “Tolibon” kuchli nazorat o‘rnatgan viloyatlarda bolalar nikohi ko‘payishini aks ettiradi.
“Tolibon”ning Ezgulikni targ‘ib qilish va illatlarning oldini olish vazirligi holatni o‘rganayotganini ta’kidladi.
Bir necha kun oldin Hilmandda yetti yoshli qiz 45 yoshli erkakka turmushga chiqdi. Ish vazirlikning Hilmand idorasiga yetkazilgach, zudlik bilan qizning otasi va huquqbuzar chaqirtirilib, ish sudga oshirilgan. Yana bir bor ta’kidlaymizki, islom tamoyillariga zid bo‘lgan voyaga yetmaganlar nikohi qabul qilinishi mumkin emas va vazirligimiz ayollar huquqlarini qo‘llab-quvvatlaydi, degan vazirlik matbuot kotibi Saif-ul-Islom Xayber.
Izoh (0)