Raqobatni rivojlantirish va iste’molchilar huquqlarini himoya qilish qo‘mitasining takliflari asosida kupe tipidagi vagonlarning havo sovitish tizimi uchun to‘lov undirilmasdan, chipta narxidan chegirilgan holatda qo‘llanmoqda. Bu haqda qo‘mita matbuot xizmati xabar berdi.
Iyul oyining o‘rtalarida o‘zbek yulduzlari tomonidan yo‘lovchi poyezdlarida konditsioner tizimi ishlamayotgani haqidagi xabarlar ijtimoiy tarmoqlarda keng muhokamalarga sabab bo‘lgandi. Qo‘mita bu holatlarni o‘rganish va aniqlik kiritish bo‘yicha “O‘ztemiryo‘lyo‘lovchi”ga tegishli tartibda so‘rov yuborib, hozirda tegishli o‘rganish ishlari olib borilayotganini ma’lum qilgandi.
Fuqarolar temiryo‘l kassalaridan bilet sotib olingan vaqtda sovitish tizimi xizmatlari uchun to‘lov amalga oshirilishiga qaramasdan yo‘lovchi poyezdlarida harakatlangan vaqtda konditsioner ishlamagandan norozi bo‘lsa, Raqobat qo‘mitasi yoki “O‘ztemiryo‘lyo‘lovchi”ga murojaat qilishi mumkin.
Bunda poyezdlarda harakatlangan vaqtda konditsioner ishlamayotganini tasdiqlovchi foto va video materiallar ham ilova qilinadi.
“Mazkur murojaatlarni o‘rganish davomida ma’lum bir yo‘nalish bo‘ylab harakatlanayotgan yo‘lovchi poyezd tarkibidagi yo‘lovchi vagonining sovitish tizimlari ishlamagani bo‘yicha murojaatlar o‘z tasdig‘ini topgan hollarda, mazkur yo‘lovchilarga havo haroratini mo‘tadillashtirish va sovitish tizimlari ishlamagani uchun tegishli miqdordagi pul mablag‘lari kompensatsiya sifatida qaytarib berilishini ma’lum qilamiz”, deyiladi xabarda.
Shuningdek, Raqobat qo‘mitasi takliflari asosida “O‘zbekiston temir yo‘llari” tomonidan 19-iyuldan kupe tipidagi vagonlarning havo sovitish tizimi uchun to‘lov undirilmasdan chipta narxidan chegirib qolina boshlandi.
Izoh (0)