Malayziya bosh vaziri Anvar Ibrohim yashash xarajatlarining ko‘payishi sababli aholini qo‘llab-quvvatlash bo‘yicha yangi chora-tadbirlarni e’lon qildi. Bangkokpost ma’lumotlariga ko‘ra, mamlakatning voyaga yetgan fuqarolari 100 ringgit (23,70 AQSH dollari) miqdorida bir martalik to‘lov oladi.
Yordam dasturining umumiy moliyalashtirish hajmi 2025-yilda 15 milliard ringgitni tashkil etadi, bu dastlab rejalashtirilgan 13 milliard ringgitdan ko‘proqdir.
Ushbu choralar Kuala-Lumpurda shanba kuni o‘tkazilishi rejalashtirilgan ommaviy norozilik namoyishi arafasida e’lon qilingan. Muxolifat hukumatni narxlar o‘sishini to‘xtata olmagani va va’da qilingan islohotlarni amalga oshirmaganligi uchun ayblayapti. Namoyishda 10-15 ming atrofida odam ishtirok etishi kutilmoqda.
Bosh vazir aholi uchun xarajatlarni yanada kamaytirish zarurligini ta’kidlab, kambag‘allikka qarshi kurashish uchun qo‘shimcha tadbirlar ko‘rishni va’da qildi. Shuningdek, hukumat RON95 markali yoqilg‘i uchun yangi subsidiya tizimini taqdim etadi, bu esa benzin narxini bir litr uchun taxminan 1,99 ringgitgacha tushiradi.
Ekspertlarning fikricha, bunday qadamlar ichki talabni qo‘llab-quvvatlash uchun zarur, biroq ular mamlakat byudjetiga qo‘shimcha bosim o‘tkazadi. Iqtisodchilar ogohlantirishicha, yoqilg‘i subsidiyalari islohotining kechikishi hukumatning 2028-yilgacha byudjet taqchilligini yalpi ichki mahsulotning 3 foizigacha kamaytirish maqsadiga erishishiga to‘sqinlik qilishi mumkin.
Izoh (0)