Sirdaryo viloyatida Lacetti haydovchisi 361 kilogramm eshak go‘shtini olib ketayotganda to‘xtatib qolindi. Bu haqda “Millar” dasturida xabar berildi.
Aniqlanishicha, 25 may kuni Qarshi—Toshkent yo‘nalishida harakatlanayotgan Lacetti to‘xtatilib, xolislar ishtirokida ko‘zdan kechirilganida mashinaning yukxonasidan noqonuniy go‘sht mahsulotlari topilgan.
Tekshiruvlar davomida haydovchi go‘sht o‘ziga tegishli emasligini, aytilgan manzilga olib ketayotganini aytgan. Viloyat IIB Jamoat xavfsizligi boshqarmasi karantin chora-tadbirlari guruhi xodimiga ko‘ra, noma’lum jonivorga tegishli 361 kilogramm go‘sht aniqlangan.
Mahsulotlar Sirdaryo viloyati veterinariya va chorvachilikni rivojlantirish bosh boshqarmasi laboratoriyasiga o‘tkazilganda eshak go‘shti ekani ma’lum bo‘lgan.
Hozirda mazkur holat yuzasidan Sirdaryo tumani Tergov bo‘limi tomonidan surishtiruv ishlari olib borilmoqda.
Oqqo‘rg‘on tumanida eshak suyaklarining suvga tashlab ketilayotgani holatidan boshlangan tadbir Ohangaron tumanida davom ettirilib, 3 nafar shaxs gumonlanuvchi sifatida ushlangani va tergovga qadar surishtiruv olib borilayotgani haqida xabar berilgan.
Ijtimoiy tarmoqlarda Surxondaryo viloyatida fuqarolarning eshak so‘ygani aytilgan va hayvonlar jasadi ko‘ringan video tarqalgandi. Viloyat hokimligi axborot xizmati rahbari bu eski video ekanligini bildirgan.
Ma’lumot uchun, eshak terisi va ichagi tibbiyotda subtovar sifatida foydalaniladi. Qonunchilikda eshak go‘shtini iste’mol qilish yoki sotganlik uchun javobgarlik yo‘q. Faqat eshak go‘shtini boshqa hayvon, masalan, mol go‘shti deb sotganlik uchun javobgarlik mavjud.+
Izoh (0)