Isroil mudofaa kuchlarining Eronga hujumlari oqibatida kamida 14 nafar yadrochi olim halok bo‘ldi. Bu haqda Fors ko‘rfazi mamlakatlaridagi ikki manbaga tayanib Reuters xabar berdi.
Ma’lum qilinishicha, olimlarning ba’zilari avtomobillarga qo‘yilgan bombalar tufayli portlagan. Eronning Nour News agentligi kamida olti nafar yadrochi olim halok bo‘lgani haqida xabar bergan. Abdulhamid Minuchehr, Ahmadrizo Zulfiqoriy, Amirhusayn Faxxiy, Matlabizoda, Muhammad Mehdi Tehronchi, Faridun Abbosiy shular jumlasidandir.
Ularning ko‘pchiligi 2020-yilda Isroil tomonidan o‘ldirilgan “Eron yadroviy loyihasining otasi” Muhsin Faxrizodaning vorislari bo‘lgan.
Isroil va Eronning o‘zaro hujumlari 13-iyunga o‘tar kechasi boshlandi. Yahudiy davlati “Isyonkor sher” operatsiyasini olib bormoqda. Uning doirasida Isroil qo‘shinlari Eron hududidagi yadroviy va harbiy obyektlarga hujum qilmoqda.
Eron oliy rahnamosi Oyatulloh Ali Xomanaiy fuqarolarga yo‘llagan murojaatida Isroilning Eronga bergan zarbalarini jinoyat deb atagan. U Isroilni “achchiq va dahshatli taqdir” kutayotganini ta’kidlagan. Tehron “Haqiqiy va’da 3” nomli operatsiyani boshlagan. Uning doirasida Isroilga yuzlab raketalar uchirilgan. Ikki davlat bir-biriga hujum qilishda davom etmoqda.
Izoh (0)