Quyoshda 15-iyunga o‘tar kechasi M quvvatli chaqnash sodir bo‘ldi.
Amaliy geofizika institutining qayd etishicha, chaqnash 18 daqiqa davom etgan. Ushbu Quyosh chaqnashi Yer uchun xavfli emas, ammo bu iyun oyidagi eng kuchlisi hisoblanadi. Institutga ko‘ra, yaqin 2 kun ichida shunga o‘xshash kuch sinfidagi yana bir nechta chaqnashlar kutilmoqda.
Quyosh chaqnashlari nurlanish quvvati bo‘yicha A dan (eng kuchsiz) X gacha (o‘ta kuchli) bo‘ladi. Chaqnash natijasida yuzaga keladigan magnit bo‘ronlari energiya tizimlari, navigatsiya uskunalari va radioaloqa ishlariga ta’sir qilishi mumkin. Ob-havoga ta’sirchan odamlar odatda bunday paytlarda o‘zini yomon his qiladi.
25-may kuni Quyoshda eng yuqori faollik sinfidagi favqulodda kuchli chaqnash sodir bo‘lgani haqida xabar berilgan edi.
Oldinroq NASA ishtirokida Yevropa kosmik agentligi (YKA) tomonidan yaratilgan Solar Orbiter kosmik kemasi Quyosh janubiy qutbining tarixdagi dastlabki suratlarini olgani haqida ma’lumot berilgan edi. YKA matbuot xizmati ushbu tasvirlarni yulduzni o‘rganishda yangi davrning boshlanishi deb baholagan.
Kema Quyoshning fotosferasi, magnit maydoni va tojini batafsil suratga olishga muvaffaq bo‘lgan. Buning uchun uchta polyarimetrik va gelioseysmik shakllantirgich (PHI), kuchli ultrabinafsha nurlanish shakllantirgichi (EUI) va toj muhiti uchun spektral shakllantirgich (SPICE) kabi maxsus asboblardan foydalanilgan.
To‘plangan ma’lumotlar olimlarga Quyoshning tashqi qatlamlaridagi modda harakatini, shuningdek, ilgari noma’lum bo‘lgan hodisalarni, jumladan, qutb gaz uyurmalarini chuqurroq o‘rganish imkonini bergan. Qo‘shimcha qilinishicha, oktyabr oyida agentlik zondning yulduzning shimoliy qutbidan janubiy qutbiga o‘tishi haqida batafsil hisobot e’lon qilishni rejalashtirmoqda.
Izoh (0)