Janubiy Koreya bilan transport va yo‘l xo‘jaligi sohasidagi hamkorlik kengaytiriladi, deb xabar bermoqda Transport vazirligi matbuot xizmati.
Ma’lum qilinishicha, ITS Asia Pacific Forum 2025 xalqaro forumi transport vaziri o‘rinbosari Ilhomjon Abdugafarov Koreya Respublikasi yer, infratuzilma va transport vaziri Park Sangvu hamda Korea Expressway Corporation korporatsiyasi prezidenti Xam Jingyu bilan muzokaralar o‘tkazdi.
Muzokaralar davomida O‘zbekiston va Janubiy Koreya o‘rtasida transport va yo‘l xo‘jaligi sohasidagi hamkorlikni kengaytirish, Koreyaning avtomagistrallar boshqaruvi, “aqlli” svetoforlar, sun’iy intellekt asosidagi harakatni boshqarish tizimlarini O‘zbekistonda joriy etish imkoniyatlari, shuningdek, Koreya hukumati tomonidan O‘zbekistonda texnik yordam va mutaxassislar tayyorlash dasturlarini amalga oshirish masalalari muhokama qilindi.
Shuningdek, muzokaralarda Koreya tomonidan O‘zbekistonda yo‘l infratuzilmasini raqamlashtirish, jumladan, aqlli tolling, ITS sensor tizimlari, harakat monitoringi bo‘yicha loyihalarni amalga oshirish, “Toshkent—Andijon pulli avtomobil yo‘lini qurish” DXSH loyihasi doirasida avtomagistral loyihalarini rivojlantirishda KEC korporatsiyasi ishtirokini ta’minlash takliflari ilgari surildi.
Bundan tashqari, O‘zbekiston va Xitoy yo‘l sohasidagi standartlarning yagona tizimini ishlab chiqishda hamkorlik qiladi. May oyinig oxirlarida Avtomobil yo‘llari qo‘mitasi delegatsiyasi vakillari va TianJin shahridagi shahar muhandislik, loyihalash va tadqiqot instituti rahbariyati bilan yo‘l sohasida yagona standartlar tizimini yaratish, innovatsion materiallar ishlab chiqish, va raqamlashtirish yo‘nalishlarida amaliy ishlar boshlash bo‘yicha hamkorlik bitimi imzolandi.
Izoh (0)