Farg‘ona viloyati hokimi Xayrullo Bozorov viloyatning Quvasoy shahridagi barcha bog‘chalarga tayyor ovqat yetkazib berish huquqini hech qanday tanlov yoki tendersiz tadbirkorga tuhfa qilgani, hokimning bu haqdagi qarori jamoatchilikdan yashirilgani xabar berilgandi.
Viloyat hokimligi tomonidan “Daryo” muxbiriga berilgan izohga ko‘ra, Farg‘ona vodiysida keytering xizmatini ko‘rsatuvchi boshqa korxona yo‘qligi tufayli ham mazkur qo‘shma korxona 5 oylik muddatga sinov-tajriba uchun tanlab olingan.
Viloyat hokimligi mas’ullarining ma’lum qilishicha, qaror davlat maktabgacha ta’lim tashkilotlarida tarbiyalanuvchilarni sog‘lom ovqatlantirishni tashkil etish ishlarini yanada takomillashtirish, belgilangan sanitariya qoidalari, normalari va gigiyena normativlariga muvofiq holda ish olib borish orqali bolalarning sog‘lom o‘sishini ta’minlash, sog‘lom ovqatlantirishning zamonaviy usullarini joriy etgan holda ta’lim-tarbiya sifati va samaradorligini oshirish maqsadida qabul qilingan.
Turkiyalik hamkorlar bilan tashkil etilgan Garden catering qo‘shma korxonasida Jahon sog‘liqni saqlash tashkiloti tomonidan tavsiya etilgan sog‘lom ovqatlanish talablari asosida bolalar uchun belgilangan ratsionda 100 turdan ziyod taomlar, salatlar hamda desertlar tayyorlanishi, korxonaga 12 nafar turkiyalik yuqori malakali shef-oshpazlar hamda ikki nafar sog‘lom ovqatlanish bo‘yicha injener-texnologlar jalb etilgani sinov tajribasi uchun ushbu korxonani tanlab olishda asos bo‘lgan.
Xalq deputatlari viloyat kengashi deputati Dilorom Mehmonovaning ma’lum qilishicha, deputatlar viloyatdagi davlat maktabgacha ta’lim tashkilotlarida sog‘lom va sifatli ovqatlantirish tartibi va holati yuzasidan o‘rganishlar olib borgan.
Davlat moliyaviy nazorat organlari bilan hamkorlikda olib borilayotgan doimiy o‘rganishlar davomida davlat maktabgacha ta’lim tashkilotlarida sifatsiz oziq-ovqat mahsulotlari ishlatilishi, ularning talon-toroj qilinishi, ovqat tayyorlash texnologik jarayonlariga rioya etmaslik, sanitariya qoidalariga amal qilmaslik holatlari ko‘p uchramoqda.
Bu borada huquq-tartibot idoralari tomonidan doimiy choralar ko‘rib borilishiga qaramay, bu kabi holatlar kuzatilishi davom etmoqda. Shundan kelib chiqqan holda, Xalq deputatlari viloyat kengashi deputatlari ham o‘z taklif va xulosalarini viloyat hokimligiga hamda Maktabgacha va maktab ta’limi boshqarmasiga kiritgan. Mazkur omillar ham viloyatda bolalarni sog‘lom va sifatli ovqatlantirishning keytering usulini tajriba sifatida tatbiq etilishiga sabab bo‘lgan.
Farg‘ona viloyati hokimi Xayrullo Bozorov tomonidan 25-iyul kuni imzolangan “Davlat maktabgacha ta’lim tashkilotlarida sog‘lom ovqatlanishni tashkil etish chora-tadbirlari to‘g‘risida”gi qarorga ko‘ra, Garden Catering qo‘shma korxonasi 1-avgustdan e’tiboran Quvasoy shahrida joylashgan, ovqatlantirishning autsorsing usuli yo‘lga qo‘yilmagan davlat bog‘chalariga keytering xizmatini ko‘rsata boshlaydi.
Qarorda bu amaliyot tajriba-sinov natijalaridan kelib chiqib, yil yakuniga qadar Farg‘ona shahridagi davlat bog‘chalariga ham joriy etilishi belgilangan.
Qayd etilishicha, 5 oy muddatlik tajriba-sinov natijasiga ko‘ra mazkur tizimni boshqa hududlarda tashkil etish bo‘yicha asoslangan takliflar Maktabgacha va maktab ta’limi vazirligiga hamda Bosh davlat sanitariya vrachiga kiritilishi belgilangan.
Farg‘ona viloyati hokimining bu qarori “Ushbu hujjat mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi tufayli” ommadan yashirib qo‘yilgandi. Viloyat hokimligi axborot xizmati rahbari Dilmurod Jumaboyevning izoh berishicha, bu jarayon texnik xatolik tufayli yuz bergan va ayni paytda mazkur qaror Adliya vazirligining yagona elektron tizimida jamoatchilik uchun ochiq holatda turibdi.
Garden Catering mas’ullarining qo‘shimcha qilishicha, qo‘shma korxona faqat ijtimoiy muassasalar, xususan, maktabgacha ta’lim tashkilotlariga xizmat ko‘rsatish uchungina tashkil etilmagan. Bu yerda tayyorlangan taomlarni xodimlarini sog‘lom va sifatli ovqatlantirishni istagan tadbirkorlar va ishlab chiqarish korxonalariga ham yetkazib berish ko‘zda tutilgan.
Izoh (0)