Фарғона вилояти ҳокими Хайрулло Бозоров вилоятнинг Қувасой шаҳридаги барча боғчаларга тайёр овқат етказиб бериш ҳуқуқини ҳеч қандай танлов ёки тендерсиз тадбиркорга туҳфа қилгани, ҳокимнинг бу ҳақдаги қарори жамоатчиликдан яширилгани хабар берилганди.
Вилоят ҳокимлиги томонидан “Дарё” мухбирига берилган изоҳга кўра, Фарғона водийсида кейтеринг хизматини кўрсатувчи бошқа корхона йўқлиги туфайли ҳам мазкур қўшма корхона 5 ойлик муддатга синов-тажриба учун танлаб олинган.
Вилоят ҳокимлиги масъулларининг маълум қилишича, қарор давлат мактабгача таълим ташкилотларида тарбияланувчиларни соғлом овқатлантиришни ташкил этиш ишларини янада такомиллаштириш, белгиланган санитария қоидалари, нормалари ва гигиена нормативларига мувофиқ ҳолда иш олиб бориш орқали болаларнинг соғлом ўсишини таъминлаш, соғлом овқатлантиришнинг замонавий усулларини жорий этган ҳолда таълим-тарбия сифати ва самарадорлигини ошириш мақсадида қабул қилинган.
Туркиялик ҳамкорлар билан ташкил этилган Garden cатеринг қўшма корхонасида Жаҳон соғлиқни сақлаш ташкилоти томонидан тавсия этилган соғлом овқатланиш талаблари асосида болалар учун белгиланган рационда 100 турдан зиёд таомлар, салатлар ҳамда десертлар тайёрланиши, корхонага 12 нафар туркиялик юқори малакали шеф-ошпазлар ҳамда икки нафар соғлом овқатланиш бўйича инженер-технологлар жалб этилгани синов тажрибаси учун ушбу корхонани танлаб олишда асос бўлган.
Халқ депутатлари вилоят кенгаши депутати Дилором Меҳмонованинг маълум қилишича, депутатлар вилоятдаги давлат мактабгача таълим ташкилотларида соғлом ва сифатли овқатлантириш тартиби ва ҳолати юзасидан ўрганишлар олиб борган.
Давлат молиявий назорат органлари билан ҳамкорликда олиб борилаётган доимий ўрганишлар давомида давлат мактабгача таълим ташкилотларида сифатсиз озиқ-овқат маҳсулотлари ишлатилиши, уларнинг талон-торож қилиниши, овқат тайёрлаш технологик жараёнларига риоя этмаслик, санитария қоидаларига амал қилмаслик ҳолатлари кўп учрамоқда.
Бу борада ҳуқуқ-тартибот идоралари томонидан доимий чоралар кўриб борилишига қарамай, бу каби ҳолатлар кузатилиши давом этмоқда. Шундан келиб чиққан ҳолда, Халқ депутатлари вилоят кенгаши депутатлари ҳам ўз таклиф ва хулосаларини вилоят ҳокимлигига ҳамда Мактабгача ва мактаб таълими бошқармасига киритган. Мазкур омиллар ҳам вилоятда болаларни соғлом ва сифатли овқатлантиришнинг кейтеринг усулини тажриба сифатида татбиқ этилишига сабаб бўлган.
Фарғона вилояти ҳокими Хайрулло Бозоров томонидан 25 июль куни имзоланган “Давлат мактабгача таълим ташкилотларида соғлом овқатланишни ташкил этиш чора-тадбирлари тўғрисида”ги қарорга кўра, Garden Cатеринг қўшма корхонаси 1 августдан эътиборан Қувасой шаҳрида жойлашган, овқатлантиришнинг аутсорсинг усули йўлга қўйилмаган давлат боғчаларига кейтеринг хизматини кўрсата бошлайди.
Қарорда бу амалиёт тажриба-синов натижаларидан келиб чиқиб, йил якунига қадар Фарғона шаҳридаги давлат боғчаларига ҳам жорий этилиши белгиланган.
Қайд этилишича, 5 ой муддатлик тажриба-синов натижасига кўра мазкур тизимни бошқа ҳудудларда ташкил этиш бўйича асосланган таклифлар Мактабгача ва мактаб таълими вазирлигига ҳамда Бош давлат санитария врачига киритилиши белгиланган.
Фарғона вилояти ҳокимининг бу қарори “Ушбу ҳужжат мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги туфайли” оммадан яшириб қўйилганди. Вилоят ҳокимлиги ахборот хизмати раҳбари Дилмурод Жумабоевнинг изоҳ беришича, бу жараён техник хатолик туфайли юз берган ва айни пайтда мазкур қарор Адлия вазирлигининг ягона электрон тизимида жамоатчилик учун очиқ ҳолатда турибди.
Garden Cатеринг масъулларининг қўшимча қилишича, қўшма корхона фақат ижтимоий муассасалар, хусусан, мактабгача таълим ташкилотларига хизмат кўрсатиш учунгина ташкил этилмаган. Бу ерда тайёрланган таомларни ходимларини соғлом ва сифатли овқатлантиришни истаган тадбиркорлар ва ишлаб чиқариш корхоналарига ҳам етказиб бериш кўзда тутилган.
Изоҳ (0)