Qozog‘istonning Qarag‘anda viloyatida 4-iyun kuni Ostonadan Chimkentga ketayotgan avtobusda yong‘in chiqdi. Yo‘lovchilar orasida O‘zbekistonning besh nafar fuqarosi ham bo‘lgan. Bu haqda Qozog‘iston Favqulodda vaziyatlar vazirligi xabar berdi.
Ma’lumotga ko‘ra, Ostona—Qarag‘anda—Olmaota avtomobil yo‘lining 960-kilometrida avtobusning motor qismida yong‘in chiqqan. O‘t o‘chirish xizmati yetib kelgunga qadar dvigatel bo‘linmasidagi yong‘in o‘chirilgan. Qutqaruvchilar avtobusdagi 30 dan ortiq odamni evakuatsiya qilgan.
Qutqaruvchilarning tezkor harakatlari natijasida barcha yo‘lovchilar evakuatsiya qilinib, yo‘lbo‘yi kempingiga olib kelindi va ularga zarur yordam ko‘rsatildi, deyiladi xabarda.
Avtobusda jami 34 yo‘lovchi, jumladan, 9 nafar bola bo‘lgan. Yo‘lovchilar orasida 5 nafar O‘zbekiston fuqarosi borligi aniqlangan. Hodisa oqibatida hech kim jabrlanmagan.
2-mart kuni Qozog‘istonning Samara—Chimkent trassasida 33 nafar o‘zbekistonlik bo‘lgan avtobus YTHga uchragandi. O‘shanda hodisa oqibatida hech kim jarohat olmagan. Avtobusdagi O‘zbekiston fuqarolari yo‘lning xavfsiz qismida joylashgan zaxiradagi avtobusga evakuatsiya qilingan edi.
Izoh (0)