BMT bosh kotibi Antoniu Guterrish O‘zbekiston prezidenti Shavkat Mirziyoyevga tavallud kuni munosabati bilan tabrik yo‘lladi.
“Muhtaram prezident janoblari, aziz birodarim!
Ushbu qutlug‘ kunda sizga eng samimiy tabriklarimni yo‘llayman.
Yaqinda Toshkentga amalga oshirgan tashrifim chog‘ida ko‘rsatgan bag‘rikeng mehmondo‘stligingiz uchun yana bir bor chuqur minnatdorlik bildirmoqchiman.
O‘zimning eng samimiy salomim va chuqur minnatdorligim bilan”, deb yoziladi Birlashgan Millatlar Tashkiloti bosh kotibi qutlovida.
Bugun O‘zbekiston yetakchisiga xorijiy davlatlar, hukumatlar va parlamentlar, nufuzli xalqaro va mintaqaviy tashkilotlar rahbarlaridan qutlovlar keldi. Maktublarda Shavkat Mirziyoyev rahbarligida O‘zbekiston davlatchilikni mustahkamlash, xalq farovonligini yuksaltirish va mamlakatning xalqaro maydondagi nufuzini oshirish yo‘lida ulkan yutuqlarga erishayotgani ta‘kidlangan.
Shuningdek, prezidentga mustahkam sog‘lik, uzoq umr va muvaffaqiyatlar, O‘zbekiston xalqiga esa tinchlik-osoyishtalik va farovonlik tilaklari, o‘zaro manfaatli hamkorlikni yanada mustahkamlashga qat’iy intilish bildirilgan.
Shavkat Mirziyoyev 1957-yil 24-iyulda Jizzax viloyatining Zomin tumanida shifokor oilasida tug‘ilgan. 1981-yili Toshkent irrigatsiya va qishloq xo‘jaligini mexanizatsiyalash muhandislari institutini tugatgan.
U 2003-yilda O‘zbekiston bosh vaziri etib tasdiqlanib, 2016-yilga qadar faoliyat yuritgan. 2016-yil 4-dekabr kuni bo‘lib o‘tgan prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. 2021-yil 24-oktyabr kuni bo‘lib o‘tgan prezident saylovida 80,1 foiz ovoz bilan O‘zbekiston prezidenti etib qayta saylangan. “Mehnat shuhrati” va “Fidokorona xizmatlari uchun” ordenlari bilan taqdirlangan.
Izoh (0)