БМТ бош котиби Антониу Гутерриш Ўзбекистон президенти Шавкат Мирзиёевга таваллуд куни муносабати билан табрик йўллади.
“Муҳтарам президент жаноблари, азиз биродарим!
Ушбу қутлуғ кунда сизга энг самимий табрикларимни йўллайман.
Яқинда Тошкентга амалга оширган ташрифим чоғида кўрсатган бағрикенг меҳмондўстлигингиз учун яна бир бор чуқур миннатдорлик билдирмоқчиман.
Ўзимнинг энг самимий саломим ва чуқур миннатдорлигим билан”, деб ёзилади Бирлашган Миллатлар Ташкилоти бош котиби қутловида.
Бугун Ўзбекистон етакчисига хорижий давлатлар, ҳукуматлар ва парламентлар, нуфузли халқаро ва минтақавий ташкилотлар раҳбарларидан қутловлар келди. Мактубларда Шавкат Мирзиёев раҳбарлигида Ўзбекистон давлатчиликни мустаҳкамлаш, халқ фаровонлигини юксалтириш ва мамлакатнинг халқаро майдондаги нуфузини ошириш йўлида улкан ютуқларга эришаётгани таъкидланган.
Шунингдек, президентга мустаҳкам соғлик, узоқ умр ва муваффақиятлар, Ўзбекистон халқига эса тинчлик-осойишталик ва фаровонлик тилаклари, ўзаро манфаатли ҳамкорликни янада мустаҳкамлашга қатъий интилиш билдирилган.
Шавкат Мирзиёев 1957 йил 24 июлда Жиззах вилоятининг Зомин туманида шифокор оиласида туғилган. 1981 йили Тошкент ирригация ва қишлоқ хўжалигини механизациялаш муҳандислари институтини тугатган.
У 2003 йилда Ўзбекистон бош вазири этиб тасдиқланиб, 2016 йилга қадар фаолият юритган. 2016 йил 4 декабрь куни бўлиб ўтган президент сайлови якунлари бўйича сайловчиларнинг 88,61 фоиз овози билан Ўзбекистон президенти этиб сайланган. 2021 йил 24 октябрь куни бўлиб ўтган президент сайловида 80,1 фоиз овоз билан Ўзбекистон президенти этиб қайта сайланган. “Меҳнат шуҳрати” ва “Фидокорона хизматлари учун” орденлари билан тақдирланган.
Изоҳ (0)