O‘zbekistonda 5-iyundan oliy va kasbiy taʼlim muassasalariga o‘qishga kirish uchun qabul boshlandi.
Oliy ta’lim, fan va innovatsiyalar vazirligi prezident farmoniga muvofiq, oliygohlar bakalavriatiga qabul jarayoni ikki bosqichda — “avval test, so‘ng tanlov” tamoyiliga muvofiq amalga oshirilishini eslatdi.
1-bosqichda abituriyentlar har yili 5-iyundan 25-iyungacha (25-iyun kuni ham) test sinovi topshirish uchun my.uzbmb.uz saytida onlayn ro‘yxatdan o‘tadi hamda quyidagilarni tanlaydi:
Faqat test sinovida ishtirok etsa:
- fanlar majmuasi;
- taʼlim tili;
- test topshirish hududi.
Alohida iqtidor talab etiladigan taʼlim yo‘nalishlari bo‘yicha kasbiy/ijodiy imtihonlarda ishtirok etsa:
- taʼlim tili;
- test topshirish hududi;
- alohida iqtidor talab etiladigan taʼlim yo‘nalishi;
- kasbiy (ijodiy) imtihon topshiriladigan oliygoh.
Oliygohlarga kirish imtihonlari iyul-avgust oylarida o‘tkaziladi.
2-bosqichda abituriyentlar kirish imtihonlari to‘liq yakunlanganidan so‘ng 15 kun davomida my.uzbmb.uz sayti orqali quyidagilarni tanlaydi:
- oliy taʼlim muassasasi;
- bakalavriat taʼlim yo‘nalishi;
- taʼlim shakli;
- tanlov ustuvorligi.
Abituriyent test sinovida to‘plagan ballarini imtihon o‘tkazilgan kunning ertasiga bilishi mumkin. Uning talabalikka tavsiya etilgan yoki etilmagani qabul jarayonining 2-bosqichi to‘liq yakunlangandan keyin bir hafta muddatda Bilimni baholash agentligi saytida eʼlon qilinadi.
Texnikumlarda o‘qish istagini bildirgan abituriyentlar oliygohlarga qabulning yakuniy natijasi eʼlon qilinganidan so‘ng 10 kunda quyidagilarni tanlaydi:
- texnikum;
- kasb va mutaxassislik;
- taʼlim shakli.
Natija bir hafta muddatda Bilimni baholash agentligi saytida eʼlon qilinadi.
Ma’lum qilinishicha, abituriyentlar va ularning ota-onalariga qulayliklar yaratish maqsadida Oliy ta’lim, fan va innovatsiyalar vazirligi hamda barcha oliy ta’lim muassasalarida “Qabul-2025” shtabi faoliyati yo‘lga qo‘yildi.
Milliy statistika qo‘mitasi ma’lumotlariga ko‘ra, O‘zbekistonda 10 yil ichida faoliyat yuritayotgan oliy taʼlim tashkilotlari soni 3,2 barobarga ko‘paygan. Oliy ta’lim, fan va innovatsiyalar vazirligining xabariga ko‘ra, ayni vaqtda O‘zbekistonda jami 201 ta oliygoh faoliyat yuritmoqda.
“Taʼlim sohasidagi loyihalar markazi” loyiha ofisi negizida Prezident administratsiyasi huzurida Taʼlim sifatini taʼminlash milliy agentligi tashkil etiladi. 2025/2026-o‘quv yilidan boshlab ta‘limning sirtqi shakliga qabul tugatildi.
Izoh (0)