Prezident farmoyishi bilan 2025/2026-o‘quv yili uchun davlat grantlari tasdiqlandi. Hujjatga asosan, bakalavriat va magistratura uchun jami 45 ming 422 ta davlat granti ajratiladi. Bugun, 19-iyul kuni Oliy taʼlim, fan va innovatsiyalar vazirligi sohalar kesimida grantlar taqsimotini eʼlon qildi.

Bakalavriatda grantlar taqsimoti
Bu yil bakalavriatga qabul qilingan 35 ming 500 talabaning o‘qishi davlat byudjetidan moliyalashtiriladi. Eng ko‘p grantlar muhandislik, ishlov berish va qurilish sohalariga ajratildi — 10 009 ta.
Qolgan sohalar uchun grantlar taqsimoti quyidagicha:
- Tabiiy fanlar, matematika va statistika — 4 905 ta;
- Taʼlim — 4 650 ta;
- Sog‘liqni saqlash va ijtimoiy taʼminot — 3 450 ta;
- Qishloq, o‘rmon, baliq xo‘jaligi va veterinariya sohalariga — 3 460 ta;
- Sanʼat va gumanitar fanlar — 3 166 ta;
- Axborot-kommunikatsiya texnologiyalari — 2 230 ta;
- Tillar — 1 925 ta;
- Biznes boshqaruv va huquq — 1 012 ta;
- Xizmatlar — 1 925 ta;
- Ijtimoiy fanlar, jurnalistika va axborot — 610 ta;
- Transport xizmatlari — 130 ta.
Magistraturada grantlar taqsimlanishi
Yangi o‘quv yilida 9 ming 922 ta magistr davlat hisobidan tahsil olish imkoniga ega bo‘ladi. Mazkur taʼlim shakli bo‘yicha ham muhandislik, ishlov berish va qurilish yo‘nalishlariga ajratilgan grantlar ulushi ko‘p — 3 229 ta.
Keyingi o‘rinlarda tabiiy fanlar, matematika va statistika sohalarida tahsil oluvchilarga 1 948 ta grant o‘rni beriladi. Qolgan yo‘nalishlar bo‘yicha grantlar taqsimlanishi quyidagicha:
- Sog‘liqni saqlash va ijtimoiy taʼminot —1 163 ta;
- Qishloq, o‘rmon, baliq xo‘jaligi va veterinariya — 1 124 ta;
- Taʼlim — 517 ta;
- Sanʼat va gumanitar fanlar — 677 ta;
- Gumanitar fanlar (tillardan tashqari) — 140 ta;
- Tillar 395 ta;
- Ijtimoiy fanlar, jurnalistika va axborot — 124 ta;
- Biznes boshqaruvi va huquq — 327 ta;
- Axborot kommunikatsiya texnologiyalari — 635 ta;
- Xizmatlar —178 ta.
Qo‘shimcha grantlar
Davlat tomonidan yuqoridagilardan tashqari yana bir necha yo‘nalishda grantlar ajratilishi belgilandi. Jumladan, xorijiy va nodavlat OTMlar uchun 1 320 ta grant beriladi. Xotin-qizlar uchun 4 000 ta, chet eldagi o‘zbekistonlik yoshlarga 30 ta davlat granti ajratiladi.
Endi grantlar har yili qayta taqsimlanadi
2025-yil 10-martdagi hukumat qaroriga ko‘ra, endilikda davlat grantlari har o‘quv yili yakunlangandan keyin qayta taqsimlanadi. Yangi tartib bo‘yicha kontrakt asosida tahsil olayotgan talabalar ham ikkinchi va undan keyingi kurslarda grantda o‘qishi mumkin.
Grant asosida o‘qishga kirgan talaba bir yil davomida davlat hisobidan tahsil qoladi, unga stipendiya beriladi. Keyingi o‘quv yilida ham grantda o‘qishi uchun esa birinchi kursdagi o‘rtacha bahosi (GPA) 3,5 ball va undan yuqori bo‘lishi kerak. Agar ballar belgilangan ko‘rsatkichdan past bo‘lsa, talabaga ikkinchi kursdan avtomatik ravishda grant berilmaydi.
Taʼlim grantini ikkinchi va keyingi kurslarda faqat GPA 3,5 va undan yuqori bo‘lgan talabalar saqlab qoladi. Yaʼni 3,5 dan past ball to‘plasa, talabaning o‘qishi kontraktga o‘tadi (o‘zi pul to‘lab o‘qiydi).
Ammo keyingi kursda GPA 3,5 yoki undan yuqoriga ko‘tarilsa, yana qaytadan grantga o‘tish imkoni bor.
Grantlar asosan ikki qismga bo‘linadi. Birinchisi, to‘liq grant — bir yillik o‘qish pulini davlat to‘lab beradi va stipendiya bilan taʼminlaydi.
To‘liq bo‘lmagan grant — o‘qish pulining yarmini davlat to‘laydi, lekin stipendiya berilmaydi.
Shu bilan birga, qo‘shimcha davlat granti bor. U 4 va undan yuqori GPA bilan o‘qigan, ijtimoiy holati og‘ir talabalar uchun beriladi.
Taʼlim grantiga talabgorlar uchun OTM rasmiy veb-saytida onlayn ro‘yxatdan o‘tish va erishgan yutuqlarini asoslovchi hujjatlarni yuklash imkoniyati yaratiladi.
Grantlarga talabgorlar oliygohlar huzurida tashkil etiladigan maxsus komissiyalar tomonidan baholanib, natijalar yangi o‘quv yili boshlanishidan oldin eʼlon qilinadi.
Ma’lumot uchun, joriy yilgi qabul yakuniga ko‘ra, davlat OTMlariga kirish uchun ro‘yxatdan o‘tgan abituriyentlar soni 732 ming 411 nafarni tashkil etdi. Bu so‘nggi yetti yil ichidagi eng kam miqdor hisoblanadi.
Izoh (0)