Oliy Majlis Qonunchilik palatasi deputati, O‘zLiDeP fraksiyasi a’zosi Shahnoza Xolmahamatova tezlikni oshirganlik uchun qat’iy choralar ko‘rish kerakligini ta’kidladi. Bu haqda u o‘zining Telegram’dagi kanaliga yozib qoldirdi.
Xolmahamatovaning yozishicha, qonunchilikda belgilangan harakat tezligini soatiga 40 kilometrdan ko‘p kattalikda oshirib yurganlik uchun hech qanday ikkilanishsiz transport vositasini boshqarish huquqidan uch yil muddatga mahrum qilish kerak.
Bunday choralarni ishga tushirishdan maqsad shu kunlarda katta tezlikda harakatlanib, buni o‘z ijtimoiy sahifalariga joylashtirayotganlar ko‘paygani va bu boshqalarni ham qoidabuzarliklarga jalb qilayotganida deb ta’kidlagan. Bu esa fojiali halokatlarga, begunoh odamlarning o‘limiga sabab bo‘lmoqda.
Statistik ma’lumotlarga ko‘ra, O‘zbekistonda birgina 2023-yilning o‘zida 9839 ta yo‘l-transport hodisasi sodir etilib, ularda 9209 nafar fuqaro jarohatlangan va 2282 nafar fuqaro halok bo‘lgan. Ushbu holatlar asosan katta tezlikda harakatlanish, yo‘l qoidasiga amal qilmaslik oqibatida sodir etilgan.
Bu kabi noxush xatti-harakatlarning oldini olib, unga nisbatan qat’iy choralar ko‘rish zarur, deb hisoblayman. Shu sababli qonunchiligimizda belgilangan harakat tezligini soatiga 40 kilometrdan ko‘p kattalikda oshirib yurganlik uchun hech qanday ikkilanishsiz transport vositasini boshqarish huquqidan uch yil muddatga mahrum qilish taklifini bildiraman. Ya’ni shahar ichida tezlik 60 etib belgilangan bo‘lsa, 100 tezlikda yuradigan ‘shovvoz’ haydovchilar transport vositasini boshqarish huquqidan mahrum bo‘lishi shart”, deb yozadi Xolmaxamatova.
Deputatning qayd etilishicha, bu orqali fuqarolar mas’uliyatini oshirish va yo‘llarda xavfsizlikni ta’minlash, fuqarolarning hayotini saqlash hamda avtohalokatlar soni kamayishiga erishishga umid bildirgan.
Bir necha kun oldin Samarqand va Navoiy viloyatlarida jamoatchilikni junbishga keltirgan yo‘l-transport hodisalari haqida xabarlar berilgandi. YTH ishtirokchilari 7-8 yoshli bolalar bo‘lib, ular tez harakatlangan avtomobillar sabab halok bo‘lgan edi.
2024-yilning 5 oyida mamlakat bo‘yicha sodir bo‘lgan umumiy yo‘l-transport hodisalarining soni har 100 ming aholiga 7,2 tani tashkil etgan bir paytda ushbu salbiy ko‘rsatkich Toshkent shahrida 12,8 taga, Toshkent viloyatida 12,2 taga, Namangan viloyatida 9,1 taga va Farg‘ona viloyatida 8,4 taga yetgan.
Izoh (0)