Ekologiya, atrof-muhitni muhofaza qilish va iqlim o‘zgarishi vazirligi huzuridag “Hisor” davlat qo‘riqxonasida o‘rnatilgan fotoqopqonga qor qoploni muhrlandi.
Qayd etilishicha, so‘nggi o‘n yilliklar davomida qor qoplonining soni uzluksiz kamaymoqda. Hozirda O‘zbekistonda bu hayvonning umumiy ko‘rsatkichi turli hisob-kitoblarga ko‘ra, 30-50 tadan 80-120 tagachani tashkil etadi. G‘arbiy Tyan-Shanda 10-40 tagacha, Pomir-Oloyda 20-80 tagacha qor qoploni qayd etilgan.
Xalqaro tabiatni muhofaza qilish ittifoqi (TMXI) Qizil ro‘yxati va O‘zbekiston Qizil kitobiga yo‘q bo‘lib ketish arafasida turgan, lokal tarqalgan tur sifatida kiritilgan. Shuningdek, yo‘q bo‘lib ketish xavfi ostidagi yovvoyi fauna va flora turlari bilan xalqaro savdo qilish to‘g‘risidagi konvensiya (CITES) ro‘yxatidan joy olgan.
Fotoqopqonga muhrlangan noyob hayvonlar
2023-yilning sentyabr oxirlarida “Zomin” davlat qo‘riqxonasiga o‘rnatilgan fotoqopqonga “Archa maydon” hududida sayr qilib yurgan ona-bola Turkiston silovsini tushib qolgani ma’lum bo‘lgan edi. 2022-yilning oktyabr oyida “Surxon” davlat qo‘riqxonasiga o‘rnatilgan fotoqopqonga manul tushib qolgandi. Shuningdek, “Hisor” davlat qo‘riqxonasi qo‘riqlash xodimlari tomonidan o‘rnatilgan fotoqopqon obyektiviga Turkiston silovsini, “Chotqol” davlat biosfera qo‘riqxonasida esa qor qoploni muhrlangani to‘g‘risida xabar berilgandi.
Izoh (0)