“Шаҳар ичида 100 тезликда юрадиган ҳайдовчилар транспорт воситасини бошқариш ҳуқуқидан маҳрум бўлиши шарт” — депутат

Олий Мажлис Қонунчилик палатаси депутати, ЎзЛиДеП фракцияси аъзоси Шаҳноза Холмаҳаматова тезликни оширганлик учун қатъий чоралар кўриш кераклигини таъкидлади. Бу ҳақда у ўзининг Telegram’даги каналига ёзиб қолдирди.

Холмаҳаматованинг ёзишича, қонунчиликда белгиланган ҳаракат тезлигини соатига 40 километрдан кўп катталикда ошириб юрганлик учун ҳеч қандай иккиланишсиз транспорт воситасини бошқариш ҳуқуқидан уч йил муддатга маҳрум қилиш керак.

Бундай чораларни ишга туширишдан мақсад шу кунларда катта тезликда ҳаракатланиб, буни ўз ижтимоий саҳифаларига жойлаштираётганлар кўпайгани ва бу бошқаларни ҳам қоидабузарликларга жалб қилаётганида деб таъкидлаган. Бу эса фожиали ҳалокатларга, бегуноҳ одамларнинг ўлимига сабаб бўлмоқда.

Статистик маълумотларга кўра, Ўзбекистонда биргина 2023 йилнинг ўзида 9839 та йўл-транспорт ҳодисаси содир этилиб, уларда 9209 нафар фуқаро жароҳатланган ва 2282 нафар фуқаро ҳалок бўлган. Ушбу ҳолатлар асосан катта тезликда ҳаракатланиш, йўл қоидасига амал қилмаслик оқибатида содир этилган.

Бу каби нохуш хатти-ҳаракатларнинг олдини олиб, унга нисбатан қатъий чоралар кўриш зарур, деб ҳисоблайман. Шу сабабли қонунчилигимизда белгиланган ҳаракат тезлигини соатига 40 километрдан кўп катталикда ошириб юрганлик учун ҳеч қандай иккиланишсиз транспорт воситасини бошқариш ҳуқуқидан уч йил муддатга маҳрум қилиш таклифини билдираман. Яъни шаҳар ичида тезлик 60 этиб белгиланган бўлса, 100 тезликда юрадиган ‘шоввоз’ ҳайдовчилар транспорт воситасини бошқариш ҳуқуқидан маҳрум бўлиши шарт”, деб ёзади Холмахаматова.

Депутатнинг қайд этилишича, бу орқали фуқаролар масъулиятини ошириш ва йўлларда хавфсизликни таъминлаш, фуқароларнинг ҳаётини сақлаш ҳамда автоҳалокатлар сони камайишига эришишга умид билдирган.

Бир неча кун олдин Самарқанд ва Навоий вилоятларида жамоатчиликни жунбишга келтирган йўл-транспорт ҳодисалари ҳақида хабарлар берилганди. ЙТҲ иштирокчилари 7-8 ёшли болалар бўлиб, улар тез ҳаракатланган автомобиллар сабаб ҳалок бўлган эди.

2024 йилнинг 5 ойида мамлакат бўйича содир бўлган умумий йўл-транспорт ҳодисаларининг сони ҳар 100 минг аҳолига 7,2 тани ташкил этган бир пайтда ушбу салбий кўрсаткич Тошкент шаҳрида 12,8 тага, Тошкент вилоятида 12,2 тага, Наманган вилоятида 9,1 тага ва Фарғона вилоятида 8,4 тага етган.