AQSH harbiy-dengiz kuchlarining kamida ikkita esminetsi hamroh kemalari bilan birga Eronning Isroil hududiga bergan zarbalarini qaytarishda ishtirok etmoqda. Bu haqda Amerikaning ABC News telekanali o‘z manbalariga asoslanib xabar bermoqda.
_steams_through_the_Mediterranean_Sea-6-NLOCNG.avif)
13-iyundan boshlab Isroil operatsiyasi davomida Sharqiy O‘rta Yer dengizida joylashgan USS The Sullivans va USS Arleigh Burke (ikkalasi ham Arleigh Burke turidagi) esminetslari mamlakat hududini Eronning ballistik raketalaridan himoya qilgan. Shu hafta boshida Isroilni qo‘llab-quvvatlashni davom ettirish uchun mintaqaga USS Thomas Hudner (shuningdek, Arleigh Burke turidagi) esminetsi yetib kelgan, USS Arleigh Burke esa mintaqani tark etgan.
Shu bilan bir vaqtda, Arabiston dengizida USS Carl Vinson aviatashuvchisi to‘rtta harbiy kema hamrohligida joylashgan. U Isroil osmonini himoya qilishda ishtirok etmaydi, balki AQSHning Yaqin Sharqdagi harbiy bazalari xavfsizligini ta’minlash bilan shug‘ullanadi.
ABC News ma’lumotlariga ko‘ra, USS Nimitz aviatashuvchisining zarba guruhi iyun oyi oxirida mintaqaga yetib kelishi va USS Carl Vinson o‘rnini egallashi kutilmoqda. So‘nggi aviatashuvchi esa AQSHdagi o‘z bazasiga qaytishi kerak.
Isroil 13-iyunga o‘tar kechasi Eronning yadro dasturiga qarshi “Isyonkor sher” operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
Izoh (0)