Sirdaryo viloyati Oqoltin tumanida sodir bo‘lgan Lacetti va avtobus to‘qnashuvida bir kishi halok bo‘ldi. Bu haqda viloyat YHXB xabar berdi.
Keltirilishicha, holat 19-iyun kuni tonggi soat 5:40 larda Sirdaryo viloyati Oqoltin tumani hududidan o‘tuvchi xalqaro ahamiyatdagi A-373 avtomobil yo‘lining 116-kilometrida sodir bo‘lgan. Lacetti haydovchisi rul boshqaruvini yo‘qotishi oqibatida yo‘lni ikkiga ajratib turuvchi temir to‘siqqa borib urilgan.
Oqibatda ushbu yo‘nalish bo‘ylab harakatlanib kelayotgan Yutong rusumli transport vositasi Lacetti’ga borib to‘qnashadi. YTH sabab Lacetti’da yo‘lovchi sifatida harakatlanib kelayotgan 1 nafar yo‘lovchi tan jarohatlar olib, tuman tibbiyot birlashmasi jonlantirish bo‘limida vafot etgan.
Holat yuzasidan surishtiruv harakatlari olib borilmoqda.
25-may kuni Namanganda Nexia-3 YTHga uchrab, haydovchisi bilan birga yonib ketgandi. Farg‘onada Nexia haydovchisi bosib ketgan velosipeddagi 12 yoshli bola vafot etdi. Haydovchi uch yil muddatga barcha turdagi transport vositalarini boshqarish huquqidan mahrum qilinib, 5 yilga ozodlikdan mahrum etildi. 10-mayda Toshkent viloyati Bekobod tumanida Damas “peshexod”dan o‘tayotgan piyodani bosib ketdi.
8-iyun kuni Toshkentda motosikl va skuter o‘rtasida sodir bo‘lgan yo‘l-transport hodisasida ikki nafar haydovchi vafot etgan.
YTHlar statistikasi
O‘zbekistonda 2025-yilning dastlabki uch oyida YTH sodir etishi oqibatida 891 nafar shaxs sudlandi.
2024-yil davomida Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan 3 321 nafar shaxs sudlangan. Ularning 917 nafariga ozodlikdan mahrum qilish jazosi, 2 404 nafariga esa ozodlikdan mahrum qilish bilan bog‘liq bo‘lmagan jazolar tayinlangan.
2025-yilning I-choragi mobaynida ushbu modda bilan 891 nafar shaxs sudlanib, ularning 173 nafariga ozodlikdan mahrum qilish jazosi tayinlangan.
Shuningdek, 718 nafar fuqaroga ozodlikdan mahrum qilish bilan bog‘liq bo‘lmagan jazolar tayinlandi.
Izoh (0)